Hoxe visitei a Sevi Martínez e Beatriz Manjón en A Solaina co gallo da proximidade da Noite de Reis, para falar do que serán algúns dos agasallos máis habituais, os videoxogos:

Pasámolo bastante ben, e aínda que quedaron moitas cousas no tinteiro, gustaríame facer algúns apuntamentos para quen pille algún agasallo de última hora:
- A Nintendo 3DS é un agasallo caralludo este ano, pois aínda son poucos os que teñen a consola e comeza a ter un catálogo de xogos moi sólido. O meu xogo favorito para a consola é o Super Mario 3D Land, pero o Mario Kart 7, o The Legend of Zelda: Ocarina of Time e Street Fighter IV 3D Edition tamén son uns xogazos (es estes 2 últimos poden atoparse a prezos de ganga tirando de importación).
- Os trebellos como o iPod Touch ou o Samsung Galaxy S WiFi 3.6 (coido que o teñen de oferta en El Corte Inglés) están moi ben para os rapaces que piden un smartphone coma tolos, pois achégalles xusto o que querían do dispositivo, sen asumir compromisos de permanencia coas operadoras, aínda que para moitos haberá unha alternativa que tamén resultará moi atractiva: Tú. Falo o Operador Móbil Virtual de Tuenti, que ten móbiles en prepagamento bastante interesantes por xuntar prestacións avanzadas cun prezo moi atractivo.
- Para os que queiran un tablet, e o iPad 2 parézalles moi caro, unha das poucas alternativas que recomendaría sería o ARCHOS 80 G9, por ser un tablet con Android 3.2 (os que veñen con Android 2.x non achegan unha boa experiencia de uso) e un prezo bastante axustado (249 euros). Tamén hai a opción de adquirir tablets de grande marcas a prezos moi atractivos, xa que nas últimas semanas están a saldar moitos ante as dificultades de competir co iPad (pois coincidían en rango de prezos), pero nese caso eu optaría por agardar unhas semanas, pois están a chegar os primeiros tablets con Android 4.0, o que podería tirar os prezos dos que veñen con Android 3.x.

Para quen desexe agasallar por videoxogos para as consolas de videoxogos domésticas e ordenadores, diríalle que os xogos de referencia deste ano poderían ser:
- Para PC: Battlefield 3 (o xogo de guerra en rede definitivo para moitos), Football Manager 2012 (o herdeiro do PC Fútbol) e Star Wars: The Old Republic (para frikis que gusten de xogar en rede).
- Para PlayStation 3: Call of Duty: Modern Warfare 3 (tópico pero efectivo), FIFA 12 (por fin os xogadores caeron da burra e pasaron do Pro Evolution Soccer) e Uncharted 3: La Traición de Drake (que aínda que é peor que Uncharted 2 segue a ser un xogazo).
- Para Xbox 360: o Modern Warfare 3 e o FIFA 12 tamén funcionan ben na consola de Microsoft; entre os amantes do motor arrasa o Forza Motorsport 4, para os que teñan Kinect é un flipe o Dance Central 2 e para os que gusten de pegar tiros en rede está de pinga o Gears of War 3.
- Para Wii: o xogo estrela é o The Legend of Zelda: Skyward Sword (posiblemente o mellor xogo da historia para a consola de Nintendo), o imprescindible para roleiros é o Xenoblade Chronicles (que tamén pode mercarse cun mando vermello, o que mellora o seu atractivo como agasallo) e para as festas está a arrasar o Just Dance 3 que recomendo simplemente polo feito de incluír como tema Let’s Go To The Mall de Robin Sparkles:

E, para quen teña dúbidas, engadir que o xogo Batman: Arkham City é unha pasada en PC, Xbox 360 e PlayStation 3. Imprescindible para quen gozase do Batman: Arkham Asylum e sen dúbida o mellor xogo baseado nun personaxe de cómic que se fixo nunca.

Para moitos buscar a Wally entre moreas de xente era todo un divertimento, pero hoxe propóñovos buscar ao robot cinematográfico Wall·E:

Sei que é moi doado atopar á cativa criatura robótica de Disney, pero o que me fixo graza deste poster (que en breve estará dispoñible para a súa venda) foi a recompilación de robots de numerosas películas e series de televisión (e videoxogos): Star Wars, Terminator, Dr. Who, Futurama, Ulises XXXI, Os Supersónicos, Matrix, Robots, Furia de Titáns, O Dormilón, Spaceballs, Transformers, Lexx, Guía do Autoestopista Galáctico, Robocop, Comando G… con mención especial ás series da TVG Dick Spanner, Os Falcóns do Espacio e Buck Rogers no século XXV e a unha das miñas friki-películas favoritas: A Viaxe Alucinante de Bill e Ted (descubrín a película na TVG, e rematei mercando as dúas entregas en DVD).
Tamén resulta curioso poder ver entre tanto robot de ficción á mascota de Bad Robot. Para vós, ¿cal é o robot máis curioso da imaxe ou o que achega máis lembranzas?

Cando a finais de marzo chegou ás tendas a Nintendo 3DS a un prezo de 249 euros, había unanimidade en que tal prezo estaba pensado só para early adopters que quixeran facerse coa consola nos primeiros meses (cando aínda habería poucos xogos) e que, atendendo a outros precedentes, o prezo manteríase ata pasado o Nadal, de xeito que só pagarían o valor inicial da consola os caprichosos, pero como o factor da pantalla 3D da consola en vez de incrementar as vendas causou o efecto contrario (sospeito que pola incidencia dos medios de comunicación de masas que insistían en que as 3D marean, cando iso só acontece a algunhas persoas, e nin sequera é o máis importante da consola) polo que Nintendo veuse forzada a rebaixar o prezo da 3DS antes do programado, polo que dende a semana pasada xa estaba dispoñible a 169 euros, o que fai que a 3DS sexa máis económica que a Nintendo DSi XL, o que case resulta ofensivo (pois tecnoloxicamente están moi distantes).

Pero, ¿é posible conseguir a consola aínda a mellor prezo? Existen varios métodos, como mercala nun pack con algún xogo (co que normalmente afórrase algo), buscar ofertas puntuais (que hai) ou utilizar o truco da importación, pois resulta que a Nintendo 3DS está á venda no Amazon británico por 129,91 £ (148,23 €) incluíndo portes (pois supera as 25 £). ¿Cal é a pega de mercala alí? Pois principalmente que o adaptador de corrente é para enchufes británicos, o que ten varias solucións:
- mercar un adaptador de enchufe (pouco recomendable)
- reciclar un adaptador doutra DS (resulta que a 3DS utiliza os mesmos adaptadores que as súas predecesoras)
- mercar un adaptador de corrente europeo barateiro (en DealExtreme véndenos a 2,23 € con portes incluídos)
Deste xeito a Nintendo 3DS é toda unha ganga, pois pode mercarse por uns 150 euros (o que lle custou a moitos a súa primeira DS), conserva a compatibilidade cos xogos de DS/DSi e permite gozar de multitude de títulos novos entre os que é posible conseguir algún a bo prezo:

España Prezos sen oferta	45,95 €	45,95 €	45,95 €	39,95 €
Zavvi.es Portes incluídos	18,45 €	18,45 €	21,95 €	21,95 €
Amazon.co.uk Portes incluídos a partir de 25 £	18,99 £ 21,67 €	14,99 £ 17,10 €	14,99 £ 17,10 €	9,99 £ 11,40 €

Os xogos da táboa elixinos a conciencia: Super Street Fighter IV: 3D Edition é o mellor xogo de lanzamento da 3DS, Rayman 3D é un remake de Rayman 2 (xogo de plataformas en 3D na liña do Mario 64), Rabbids 3DS é un plataformas moi na liña do Super Mario Bros e o Puzzle Bobble Universe é o típico xogo das bolas, ao que as 3D non engaden nada, pero que garante moitas horas de xogo.

Tamén hai prezos semellantes con outros xogos de lanzamento (coma o de coches Ridge Racer 3D ou o Ghost Recon: Shadow War), polo que quen queira mercar agora a consola para non ter que agardar a que saian os grandes xogos de 3DS (en setembro chega Star Fox 64 3D, en novembro Super Mario Land 3D, en decembro Super Mario Kart 7 e outras estreas fortes demoráronse a primeiros de 2012, pois supoño que esperan a despois de Nadal para pillar un parque de consolas maior) ten unha excelente oportunidade.

Por se acaso, tamén aviso aos máis arriscados de que as flashcart para 3DS non serven para xogar a títulos desta consola, senón que só funcionan cos xogos de DS/DSi, polo que principalmente servirían para curar o mono de xogos mentres non haxa máis títulos de 3DS no mercado ou para, simplemente, poder gozar de xogos vellos no caso de decidir vender a vella consola e os seus xogos para mercar a nova (algo bastante habitual).

En novembro chegará á Xbox 360 un novo xogo dos coellos tolos de Rayman que fará uso de Kinect (teño bastantes ganas de probalo, pois este tipo de xogos tenden a ser tan chorras que fan graza) e para ir creando expectación non tiveron mellor idea que parodiar a estrea cinematográfica desta semana:

Aproveito para comentar aos seareiros máis fieis da saga de J. K. Rowling que esta tarde moitos cines programan unha sesión dobre coas dúas partes de Las Reliquias de la Muerte (ou sexa, que pola noite é posible ver a película que o resto dos mortais irán ver a partir do venres).

Descoñecía que o actor Robin Williams era tan friki que puxera de nome Zelda á súa filla polo videoxogo protagonizado por Link, pero vese que os de Nintendo escoitaron a curiosa anécdota e decidiron aproveitala para o anuncio televisivo que acompañará a The Legend of Zelda: Ocarina of Time 3D que chega este venres ás tendas para a Nintendo 3DS:

O anuncio é divertidísivo, e tamén podo confirmar que o xogo é unha pasada (probei a demo hai 3 meses), converténdose con toda seguridade no primeiro vende-consolas para 3DS (unha mágoa que non fose un xogo de lanzamento) e que chega xusto no ano no que a saga de Zelda fai 25 anos, deixando claro que algúns imos vellos, e que conceptos como Super Mario, Donkey Kong ou Zelda son tan bos que poden manterse no tempo como clásicos modernos.
A Nintendo 3DS está a tardar en calar, pero co novo Zelda e os xogos que van chegar de cara ao Nadal (como Kid Iccarus: Uprising, Mario Kart e Super Mario) parece seguro que vai ser toda unha supervendas. Aínda que hoxe non vexamos moitas 3DS polas rúas, apostaría algo a que 2012 vai ser o seu ano (especialmente se rebaixan algo o seu prezo ou inclúen algún xogo con certo pulo ao adquirila).