A xente de OCC Móvil, un servizo de busca de traballo ao que pode accederse dende o móbil, lanzou unha orixinal campaña publicitaria na que con distintas imaxes representan a posibilidade de acceder á súa bolsa de emprego dende calquera lugar.
¿É atinado facer anuncios así? A eficacia descoñézoa, pero eu botei unhas risas … Iso si, o resto de anuncios son máis discretos:

O negocio dos comics nos EE.UU. é moi diferente ao español, e en certo sentido os comic books son revistas de comics, nos que a publicidade ten unha presenza moi importante, e cunha temática moi distinta da que vemos por aquí, de xeito que non se limita a auto-promocións e anuncios de xoguetes, tendo moita presenza os videoxogos e o cine, e coma exemplo desto último temos que varias coleccións renderán homenaxe á película Tron: Legacy ¡nas súas portadas!
Concretamente serán os seguintes números:
•Amazing Spider-Man #651 (Spider-Man)
•Avengers #7 (Spider-Woman)

•Avengers Academy #7 (Mercurio)
•Captain America #612 (Capitán América)

•Incredible Hulks #618 (El Motorista Fantasma)
•Invincible Iron Man #33 (Iron Man)

•New Avengers #7 (Ms. Marvel)
•Secret Avengers #7 (Caballero Luna)

•Thor #617 (Thor)
•Wolverine #4 (Lobezno)

Eu non logro decidir se estamos ante unha sinerxía digna de admiración ou se temos un caso de mercantilismo puro e duro. Aínda que como nos EE.UU. poden conseguirse a meirande parte dos comics da Marvel con 2 ou 3 portadas distintas, quen non guste de Tron sempre poderá adquirir exemplares máis ortodoxos das súas coleccións favoritas.
¿Atreveranse a repetir a experiencia no futuro? Porque como comecen a facer cousas así con películas, series de televisión ou produtos de consumo (xa estou vendo o mes de Ford ou de Xbox 360) a cousa pode resultar noxenta, e incluso resultaría molesta para os autores, que poderían ver prostituídas as súas obras.

Tron: Legacy promete ser a película do Nadal, chegando aos cines en decembro e prometendo unhas 3D espectaculares, aínda que supoño que non estará á altura da súa obra orixinal, Tron, á que renden homenaxe no seu último póster:

Non podo evitar emocionarme ao pensar que vai volver ese mundo virtual desenvolvido no interior dun sistema informático, que é todo un referente cultural friki como Juegos de Guerra, habendo moi poucas películas capaces de chegar ao seu nivel (resulta evidente que nin Hackers nin Sneakers. Los Fisgones, pese a ter o seu aquel, conseguiron chegar a marcar a unha xeración). O mellor para ir preparándose para este exercicio de nostalxia é ver o trailer da nova película:

Enrique Dans contribúe hoxe á difusión do videoclip Cuando fuimos piratas, de Toni A. Martínez (si, o mesmiño que superou as 800.000 reproducións en YouTube co seu tema Piso de 30 metros) e Gina:

Ver letra ▼

O tema musical pode descargarse de balde en MP3 e pretende deixar claros conceptos coma que os CD están obsoletos dende o momento no que non hai xeito de escoitalos nun reprodutor portátil (¿cando foi a última vez que víchedes un Discman?), que a chamada Lei Sinde é un abuso para as liberdades civís, que o peche de páxinas web non arranxa nada (como pasou co peche de Napster, que puxo as cousas aínda peor para a industria musical) e que os da SGAE están a abusar coas súas prácticas recadatorias (o que estes días estivo moi de actualidade cos ataques repetidos á súa páxina web).
Non hai por qué defender o todo gratis para entender que os modelos de negocio da musica mudaron nos últimos anos, e os que non queiran adaptarse van ter serios problemas, pois é inviable manter unha industria en base a compensacións indiscriminadas en soportes de gravación e dispositivos electrónicos. O cambio non vai chegar, senón que chegou hai anos.

Esta mañá na presentación do Salón Internacional de Tecnoloxía 2010 (SITE) volvín topar como meu exemplo favorito de fallo de usabilidade, o ascensor de EXPOCoruña:

¿Sabedes o que hai que facer para baixar ao aparcadoiro do andar -1? ¿Ten algún sentido que o ascensor teña un teclado telefónico? Un día teño que mirar a ver se deixa chamar a casa

Esta tarde levei unha sorpresa no aparcadoiro soterrado da praza de Lugo, pois as escaleiras tiñan publicidade do centro comercial Marineda City, onde está o Ikea e que no futuro acollerá un Corte Inglés, Decathlon, salas de cine (curiosamente de Cinesa, que entra así a competir con Yelmo e Filmax) e moitos outros establecementos que en boa medida coinciden cos de Espacio Coruña.
Tras a miña sorpresa inicial, non puiden evitar reflexionar nun par de cousas:
1- ¿Está ben este tipo de publicidade? Por unha banda está o detalle de que se pasase a ser habitual perdería o impacto, e pola outra temos que pode ser un auténtico perigo, pois fai que a xente mire un anuncio en vez de atender a onde pon os pés.
2- Pese a que o dominio de Internet do centro comercial é marinedacity.es anuncian o correspondente .com (que redirixe ao .es) o que dá a entender que a xente cando le un sufixo .com asóciao directamente á web, mentres que co resto de dominios de primeiro nivel non pasa o mesmo.

Pero a auténtica sorpresa da xornada para min foi atopar no escaparate da FNAC o anuncio da celebración do 75º aniversario de DC Comics no establecemento de A Coruña (aínda que finalmente quedaremos sen a exposición de orixinais):

Coido que o programa de proxeccións no Fórum da FNAC vai ser o que segue:

Luns 25 de outubro: Superman Animación.

-10h. ‘Batman y Superman. La película’.
-11h. ‘El reto de los Superamigos’.
-12:30h. ‘El reto de los Superamigos II’.
-16:30h. ‘Superman/Batman: enemigos públicos’.
-18h. ‘Superman: el último hijo de Krypton’.
-19h. ‘La liga de la Justicia: Crisis en dos tierras’.

Martes 26 de outubro: Superman Real.

-10h. ‘Superman. La película’.
-16h. ‘Superman II. La aventura continua’.
-18h. ‘Superman returns. El regreso’.

Mércores 27 de outubro: Batman Animación.

-10h. ‘Comienza la leyenda’.
-11:30h. ‘Secretos del héroe de Gotham’.
-13h. ‘Saliendo de las sombras’.
-16h. ‘El intrépido Batman volumen I’.
-17:30h. ‘El intrépido Batman volumen II’.
-19h. ‘El intrépido Batman volumen III’.

Xoves 28 de outubro: Batman real.

-10h. ‘Batman’.
-12h. ‘Batman begins’.
-16h. ‘Batman Vuelve’.
-18h. ‘El caballero oscuro’.

Venres 29 de outubro: La liga de la Justicia.

-10h. ‘El juicio de la Liga de la Justicia’.
-11:30h. ‘Desventurados. La película’.
-12:30h. ‘El paraíso perdido’.
-17h. ‘Orígenes secretos’.
-18h. ‘Los valientes y audaces’.
-19:30h. ‘Crisis en dos tierras’.

Sábado 30 de outubro: Superheroínas.

-11h. ‘Wonder Woman’.
-12h. ‘Catwoman’.
-16:30h. ‘Batman: el misterio de la batimujer’.

Estamos ante material moi interesante para quen queira facer unha achega aos personaxes de DC Comics, coa sorte de que case todo pode conseguirse con facilidade en DVD, o que tamén resulta de agradecer.

O que xa dá máis medo é o concurso de disfraces, nos que a xente poderá participar vestíndose de Batman, Superman, Green Lantern, Wonder Woman ou Catwoman, polo que supoño que ao final Green Lantern será un auténtico marxinado, e Batman e Catwoman serán os que sumen máis adeptos, pois é o que acontece normalment neste tipo de concursos.