O espellismo da TDT comeza a desaparecer, e ao igual que agora temos que na televisión estatal o 85,5% do mercado publicitario está en mans de só 2 empresas (Antena 3 e Telecinco), no ámbito local a cousa aínda está peor, deixando claro que o concurso público de licenzas para as emisoras galegas foi un desastre, xa que fixo pechar canles consolidadas (como Telecoruña) mentres que as adxudicatarias ou non chegaron a emitir ou pechan unha tras outra.
O caso coruñés é posiblemente o máis triste de toda Galicia, pois partimos dunha situación na que Telecoruña e Localia loitaban pola audiencia en analóxico a ter un único axente activo na TDT (Localia) e 2 adxudicatarios con moito morro (2 editoras de xornais teñen licenzas e sen explotar, de xeito que nin emiten nin deixan emitir a outros). O público perdía así contidos locais, pero agora a cousa vai a peor, pois tras o cese do programa Turkía agora faise oficial o peche definitivo de Localia Coruña, deixando á cidade herculina sen televisión local.
O cese de actividade da compañía comunicouse aos só 6 traballadores que quedaban despois dunha forte reestruturación onte pola mañá, e espérase que nun par de semanas rematen as emisións dunha canle histórica na cidade. Os contidos locais da Coruña quedan así fóra da televisión, o que é unha perda moi importante para a cidadanía. Síntoo moito polos compañeiros de Localia, pero egoistamente debo dicir que a perda de medios aféctanos a todos.
A cousa non parece quedar aí: Localia Pontevedra cesou as emisións locais hai un par de semanas e Localia Vigo desfaise do 40% dos seus traballadores, no que parece un prólogo do seu peche, ao que parece que acompañarán moitas outras televisións locais (oín que TV7 tamén estaba a pechar e que Santiago TV podería ir polo mesmo camiño). Mentres, parece que as emisoras piratas con botadoras de cartas intentan invadir as ondas galegas

O pasado verán comentei que o meu irmán Xurxo participara na gravación dun programa de Cifras e Letras (TVG) e finalmente emitiuse hoxe, polo que xa podemos dicir moi alto que volveu o ferrado:

A mensaxe coa que pechou o meu irmán o programa parece un tanto críptica, pois vén dunha expresión do meu pai, quen mentres Xurxo non sacaba as oposicións de primaria chamábao profesor de ferrado

Aproveito a ocasión para desculpar publicamente ao profesor Mira por chamarme Carlos Ballesteros, co que compartía a subdirección da revista Código Cero (ou sexa, que foi unha metedura de zoca comprensible), á vez que non podo evitar agradecerlle todas as veces que atendeu ás nosas preguntas sobre os seus proxectos (entre os que destaca a organización do Programa ConCiencia) e os desfiles de camisetas divertidas.
Tamén teño que admitir que, tras a sorpresa de atopar a María Canosa durante a gravación do programa (foi antes de que se fixera público que Yolanda Castaño abandonara Cifras e Letras), quedei aínda máis abraiado pola súa amabilidade. Con xente así dá gusto.

A pasada noite en V Televisión tivo lugar un debate sobre o peche de Megaupload no que interviron Pancho Casal (Continental) e Javier Pedreira Wicho (Microsiervos), con achegas moi interesantes por ambas partes:

Agradécese que en Vía V tratasen o tema, especialmente nun día no que a actualidade esta centrada no abandono da vida política por parte de José Luis Baltar.

O peche de Megaupload, Megavideo e servizos asociados (polo momento Megatrón e MegaMan están a salvo), como era previsto, converteuse en tema a abordar por moitos medios de comunicación, especialmente pola popularidade desta plataforma de compartición de ficheiros en España. Na TVG tamén fixeron referencia ao asunto no Telexornal:

Aínda que eu gocei máis da explicación desta nova para A Tarde da Radio Galega, onde o pasamos ben comentando algunhas curiosidades sobre un acontecemento que non fixo máis que comezar, e que podería ter repercursións considerables:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Unha das cousas máis curiosas foi a incautación dos coches (¡ese Cadillac rosa!) do fundador de Megaupload, un personaxe que é unha boa peza, e aínda que externamenta o servizo de Megaupload non parece comenter ningunha ilegalidade (xa intentaron ir contra el xudicialmente en múltiples ocasións, sen éxito), as autoridades norteamericanas aseguran ter evidencias de que dende a compañía estaban a promover activamente a distribución de contidos que vulneraban os dereitos de propiedade intelectual. Terán que probalo, pero a min, de momento, paréceme que os EE.UU. están a estender a súa xurisdicción á Internet, como se a Rede fose deles, o que é un precedente moi perigoso.

O pasado sábado tiven a fortuna de visitar o programa A Revista Fin de Semana da TVG para falar do 10º aniversario da edición impresa da revista Código Cero, o fenómeno das redes sociais e a iniciativa para conseguir un dominio para a lingua e a cultura galegas:

Pero para min o mellor da visita ao programa da Galega foi un momento sumamente breve no que a presentadora do programa, Lorena Pose, soltou fóra de antena un Lore, Lore, Macu, Macu. Non puiden conter a risa.

Durante a retransmisión tamén gustei do feito de que José Luís Pérez Lado citase algunhas das miñas palabras en Twitter, aludindo a temas como a formación para superar a fenda dixital, as redes sociais para a prospección de novas e tendencias e a seguridade de que imos ter un .gal en 2013.

Aproveito a ocasión para agradecer o apoio constante por parte de moitos compañeiros da CRTVG, como a xente que no seu día estaba no Bos Días, aos responsables de A Solaina e, moi especialmente, á grande familia que é a Radio Galega, onde profesionais como Xosé María Fernández Pazos, Cristina García, Rocío Pereira, Pepe Carreira e moitos outros sempre me trataron coma un máis da casa. ¡Así dá gusto traballar!