Esta mañá, co gallo do Plan de Banda Larga en Galicia 2010-2013, tivo lugar unha tertulia no programa Voces de Galicia de RadioVoz no que coincidimos no estudo coruñés Patricia Ferrol, Javier Wicho Pedreira e o que subscribe, reiterando argumentos que temos comentado noutras ocasións:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Isidoro Valerio rematou o programa comentando o caso dun alcalde que está moi posto niso das TIC, e para quen non o collera, estabamos a falar de Iván Puentes, a quen entrevistaron hai pouco en La Voz de Galicia para dar conta do uso que fai o edil da Rede.
Non é que todos os políticos deban seguir o seu exemplo, pero estaría ben que os consistorios municipais tivesen máis presente a web como canle de comunicación para os cidadáns, de xeito que no rural galego haxa máis información de utilidade que poña en valor a Internet para unha poboación que actualmente está en exclusión dixital, pero que en boa medida é pola reducida utilidade que atopan á Rede.

Para rematar, teño que precisar, por se acaso, que a fenda dixital é a división que separa aos usuarios das TIC do resto da poboación, e non outras cousas:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Esta tarde tivo lugar a última entrega do Zapping On Tour, o que finalmente será a morte da marca Zapping. Si, o derradeiro Zapping foi literal, pero iso non quere dicir que Txury e Antón vaian deixar de entreter e facer gozar á súa audiencia, xa que á morte de Zapping séguelle o nacemento de Turquía, que será o nome do programa de televisión que en poucas semanas poderemos ver en Localia.
Nos vindeiros días poderemos descargar a gravación deste impresionante directo para o recordo, coa intervención de moitos vellos amigos, e cun divertido sorteo dunha viaxe a San Francisco (que resultou non ser á cidade norteamericana).
Este repaso de distintas épocas de Zapping fíxonos lembrar o ben que o pasamos co programa nos últimos anos, e tamén houbo que recoñecer que a época de RadioVoz foi alucinante, así como a labor de moitas persoas que involucráronse considerablemente neste proxecto radiofónico, enriquecéndoo considerablemente. Dende aquí unha forte aperta a todos.
Non sei se será posible, pero gustaríame que no futuro puidese replicarse a experiencia dos directos co programa de televisión. É algo máis complexo de organizar, pero supoño que intentarase facer algún tipo de actividade que fortaleza a interacción coa audiencia, que ao final é o máis importante.

Este venres no Centro Cívico de Monte Alto terá lugar non só o último, senón o derradeiro Zapping On Tour, rematando así a xira polos centros cívicos coruñeses de Antón e Txury, polo que sería unha ocasión ideal para dar a despedida a este tipo de eventos en directo do que non sabemos se teremos máis no futuro (agardemos que si).
Zapping segue vivo, e dará guerra polas tardes en Radio Coruña-Cadena SER e, posiblemente, nalgún outro sitio máis, pero os directos seguen a ter moita máis forza que os programas radiofónicos, polo que recoméndovos asistir (podedes confirmar a vosa presenza a través de Facebook), e descargar despois o podcast para pode gardar rexistro da experiencia.
¡Vémonos alí! ¡Pasaremos lista!

O vindeiro xoves ás 20:30 horas no Centro Cívico Municipal de Elviña (sino na praza Esteban Lareo) terá lugar unha nova entrega de Zapping On Tour. Imprescindible para os seguidores de Txury e Antón.
Podedes confirmar a vosa participación a través de Facebook.

Esta mañá RadioVoz foi a emisora de radio máis tecnolóxica de España, pois de casualidade sucedéronse moitos contidos relativos á Internet e as TIC, como a miña sección de costume, un par de entrevistas e unha interesante tertulia na que participaron Miguel López (retomando os argumentos que defendeu no Bos Días), Javier Wicho Pedreira e Patricia Ferrol:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Eu reitero o meu parecer de que iso do servizo universal son palabras baleiras, e haberá que ver en qué substancian a futura lei que o regule, pois polo momento todo foi un falar. Gustei de comprobar que impera o consenso entre todos os consultados, e parece que calquera que entenda un pouco do tema xa está curtido de promesas incumpridas.

Onte en Voces de Galicia participaron nunha interesante tertulia sobre o libro electrónico Tati Mancebo e representantes da industria editorial para falar dos e-books e a revolución que supoñen de cara ao futuro:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

O tema ten moitos puntos de vista, pero sorpréndeme que os axentes do sector sexan tan conservadores, e non entren con máis decisión no asunto, pois está claro que o precedente da música de trasladarse aos libros sería nefasto, e non nos enganemos, que o vinilo está de moda é unha mentira. Eu non vexo discos de vinilo á vista en ningunha tenda que frecuento, pois é un produto de coleccionismo. De feito, ao CD agárdalle o mesmo futuro que ao vinilo, pois ao igual que agora a xente non ten xiradiscos na casa, os mozos escoitan música no seu reprodutor multimedia portátil e non teñen Discman nin nada semellante.
Por suposto, o libro impreso non vai desaparecer, pero os formatos dixitais chegaron para quedar, e tarde ou cedo van imporse especialmente en sectores como a educación (os libros de texto teñen os días contados).
Supoño que en futuras tertulias volverán a incidir neste tema, que está a xerar moito debate, posto que ninguén é quen de ver o futuro, e prepararse cun horizonte de incertidume tan vasto é unha tarefa complexa de xeito que moitos van quedar no camiño por non saber moverse na dirección axeitada. De feito, o libro é só un dos sectores da edición afectados, pois os xornais e as revistas tamén están a vivir unha revolución semellante que ninguén nega, e que parecen estar a aceptar de mellor grao.

A semana pasada a Axencia EFE difundiu unha nova na que no titular asegurábase que La UE acuerda que se podrá cortar el acceso a internet sin orden judicial, baixo a máxima de non deixar que a realidade estropee unha boa nova. Así, Javier Wicho Pedreira xa explicou nun artigo que a cousa non era realmente así e hoxe levamos o tema a RadioVoz:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Queda claro que nin está aprobada a directiva que saíu na prensa, nin é certo que autorice o corte do acceso á Internet sen autorización dun xuíz. Pero ao final, rematamos falando máis do canon e dos dereitos de autor que de asuntos con máis trasfondo como a neutralidade da Rede e a banda larga coma servizo universal, que supoño que trataremos máis adiante.

A min continúa a resultarme máis molesto o feito de que as axencias de novas manipulen a realidade de xeito impune. Os medios de comunicación replican as súas novas porque entenden que están contrastadas, e que non corresponden a versións de parte que buscan ofuscar a percepción pública e meter o medo á xente para protexer a certos grupos de presión con evidentes intereses económicos.