Dende a Asociación Cultural Melide Vida Musical comunícanme o éxito do Concerto de Verán que tivo lugar a pasada fin de semana:

OUTRO GRANDE ÉXITO DA A.C. MELIDE VIDA MUSICAL
6º CHEO CONSECUTIVO NO II CONCERTO DE VERÁN

A Asociación Cultural Melide Vida Musical ofreceu o seu 2º Concerto de Verán
Tivo lugar o pasado sábado día 28, cando os máis de 30 compoñentes desta Asociación con idades comprendidas entre os 8 e 17 anos, ofreceron a todos os melidenses citados na Igrexa Parroquial de Melide o seu II Concerto de Verán.
O devandito concerto tivo un grande éxito, conseguindo así por sexta vez consecutiva poder encher o aforamento total da igrexa, (estimado en 400 persoas), do cal a asociación lle está moi agradecida ao pobo de Melide polo apoio, a acollida e o cariño que lle demostran, dándolle a forza necesaria para poder continuar co seu proxecto.
Neste concerto, os 18 violíns, 6 violonchelos, frauta, baixo eléctrico, contrabaixo, piano, batería e os 3 solistas, interpretaron os temas que tiveron máis éxito en concertos anteriores, así como temas novos que prepararon estes nenos durante un longo tempo, conseguindo así un abano de contrastes no que cada tema marcaba unha notable diferenza co anterior.
Contaron esta vez coa incorporación dun contrabaixo e coas voces de Concepción Rodríguez Fariña, Patricia Méndez Asorey e Xoán Curros Vázquez.
Coa interpretación do, esquecido nos últimos anos, Himno de Melide composto por dous melidenses coñecidos: letra de Don Ramón Fraga e música do mestre Fernando Vázquez Arias o que ocasionou a posta de pé de todo o público asistente que o aplaudiu e o coreou cos nenos.
No devandito concerto, o seu presidente Alfonso García, sabendo o gran potencial musical que existe na bisbarra de Terra de Melide, fixo un chamamento a todo aquel que teña algún coñecemento musical para lograr o seu obxectivo no próximo ano que non é outro que o de poder incorporar novos instrumentos á Asociación, co fin de crecendo pouco a pouco, non só en número de compoñentes, senón tamén, en poder ofrecerlles concertos, cada vez de maior diversidade e ao mesmo tempo poder aumentar o coñecemento musical dos nosos compoñentes.

Completaron a información con fotografías que ilustran a atención captada polo evento musical:

Mentres en YouTube sobran os entusiastas do air guitar, os air drummers son menos frecuentes, de aí que resulte rechamante a curiosa intepretación do Dirty Cartoons de Menomena que fai un suposto indixente (que ten toda a pinta de ser un batería profesional facendo unha performance):

Tal e como comeza a función xa non sei se estamos ante un air drummer ou un auténtico mimo. ¡Tres puntos, colega!

O ano pasado non podía quitar da cabeza o Fuck You de Lilly Allen, e agora vén o tío de Gnarls Barkley, Cee-Lo Green, e provoca o mesmo efecto en milleiros de persoas co seu novo Fuck You:

Porque non son eu o único que ten a canción metida no coco, senón que incluso 50 Cent dedicoulle un remix e pola Rede xa circulan homenaxes como a que segue:

O que é unha mágoa é que este temazo estea a acadar tanto éxito cando o disco non que vai publicarse non sairá ata decembro, aínda que supoño que Cee-Lo Green saberá manterse para que chegado o día poida ter unha boa xira de concertos, pois co vozarrón que ten non debería ter problema en arrasar alí por onde vai (e se vai disfrazado de Darth Vader xa non digo nada.).

ACTUALIZACIÓN (1-9-2010) Ante o éxito da canción de Cee-Lo Green, xa hai un vídeo musical oficial (e divertidísimo):

Repetindo a experiencia do ano pasado, aínda que cunha semana de diferenza no calendario, a Asociación Cultural Melide Vida Musical organiza o vindeiro ságado na Igrexa Parroquial de Melide ás 9 de noite e seu II Concerto de Verán.
A orquestra está composta por 30 cativos melidenses entre os que hai algunhas voces e instrumentos novos, e dividirán o concerto en dúas partes: a primeira con temas clásicos e a segundo con temas actuais e de certa sona. Rematará o evento co Himno de Melide (con música de Fernando Vázquez Arias e letra de Ramón Fraga) para procurar a recuperación dunha composición que dende a Asociación Cultural non queren que quede no esquecemento.
É de agardar que o concerto xunte tanto público coma sempre, aínda que desta volta non contará con moitos veraneantes por celebrarse no derradeiro sábado do mes, o que posiblemente agradecerá moita xente da vila (pois así será máis doado atopar asento) .

Esta mañá recibín unha invitación a través de Facebook para o concerto que mañá pola noite terá lugar na Sala 600 de Melide, e aínda que estarei pola Coruña a esas horas, coido que non está de máis avisar por aquí de que a banda local Alterazión del Orden volverá a tocar no 600, desta volta acompañados polos Disolventex de Vitoria.
Velaquí o cartel do concerto que ten un prezo de entrada de 5 euros (á venda en O Lar, Sala 600 e O 13):

Rebeca Ponte, a quen os melidenses coñecen polo establecemento de fotografía e arte Sanoguera sito xunto ao Palacio de Exposicións da vila, sorpréndenos presentando mañá o seu primeiro disco On the windowsill na boîte do Playa Club coruñés a iso das 21:00 horas, polo que hoxe Isidoro Valerio entrevistouna no programa Voces de Galicia de RadioVoz, comezando pola explicación do nome artístico de Rebeca (Cardigan Bridge) e acompañando a conversa cun par de temas do álbum:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Na páxina web oficial de Cardigan Bridge podedes escoitar o disco completo, e quen guste e non poida asistir mañá ao Playa a ver a Rebeca, poderá acudir o 11 de agosto ás 23:00 horas na Casa Doñano de Ribadeo a un concerto acústico que promete repetir a experiencia desta semana.

Esta fin de semana Os Melidaos presentaron o seu primeiro disco, e remitíronme unha nota sobre o evento que reproduzo a continuación:

O grupo de música tradicional Os Melidaos presentaron na noite do sábado o seu primeiro disco que leva por título Que ben baila, que ben baila formado por once pezas e do que veñen de editar 300 copias. O acto foi moito máis que un concerto ou unha mera presentación do disco, foi un acto cultural no que se pretendeu homenaxear a todos os grupos de música tradicional de Melide que contribúen a poñer en valor a nosa cultura e música.

Para iso, no acto fóronse intercalando pezas musicadas e cantadas con breves intervencións nas que se poñía de manifesto a fonda raigame musical de Melide dende hai séculos.

O acto abriuno a concelleira de Benestar e Igualdade de Melide, Casé Rodríguez, a petición do grupo, para expoñer unha breve historia da agrupación e dar a coñecer aos seis membros dos Melidaos; nos que hai que salientar a músicos veteranos de renome como Marcelino Vázquez (gaita) e Pepe Taboada (clarinete), membros durante moitos anos do Ballet Galego Rei de Viana e da agrupación coruñesa Cántigas da Terra, entre outras moitas.

Os Melidaos estiveron arroupados no acto por moitos veciños e amigos, que ateigaron a sala, e por importantes músicos de fóra como membros do Orfeón Treixadura, da agrupación tradicional do IGAEM, a directiva de Cántigas da Terra, ou Luís de Os Carunchos, entre outros.

Os Melidaos interpretaron varias pezas do disco e, por primeira vez en público, varias pezas cantadas que foron moi aplaudidas.

O voceiro dos Melidaos, Pepiño Blanco, antigo membro de Froito Novo de Melide, dixo estar fondamente emocionado por poder compartir e divulgar a nosa música tradicional grazas á gravación deste disco. Disco que sae á luz 34 anos despois de que o lembrado grupo Froito Novo editase o seu disco Esperta Galicia (1976).

Pepiño Blanco tivo palabras de agradecemento para a Deputación da Coruña e para o Concello de Melide polo apoio ás formacións de música tradicional que pretenden dignificar a nosa música e poñela en valor. Animou aos demais grupos de Melide a que graven os seus traballos para poder chegar así coa música galega a todos os lugares.

Ao acto asistiu tamén a alcaldesa de Melide, acompañada das concelleiras de Benestar, Casé Rodríguez, de Mocidade, Anabel Ramos, e de Cultura, Conchi Castro.

A alcaldesa, Socorro Cea, tamén interviu para dicir, entre outras cousas, que Un pobo ten futuro cando as súas xentes están orgullosas do seu, orgullosas da súa cultura, felices mantendo as súas tradicións, coidando da súa música e da súa lingua. Iso é o que fan Os Melidaos: facer que a música galega siga viva, que as nosas pezas tradicionais sigan emocionando á xente, que a nosa lingua siga estando presente nas nosas vidas e que a nosa cultura se manteña por sempre inmorredoira.

Os fortes aplausos e a entrega do público asistente fixo que Os Melidaos interpretaran tres pezas máis das previstas.

Breve Historia de Os Melidaos

O grupo de música tradicional galega Os Melidaos naceu arredor do ano 2004 en Melide, lugar de fonda tradición gaiteira e berce de mestres da gaita. Esta agrupación musical xorde pola unión de músicos de diferentes xeracións e variada procedencia que consideran que a música tradicional é un tesouro que cómpre conservar.

Co disco Que ben baila, que ben baila, Os Melidaos queren render unha homenaxe a todos os músicos populares, anónimos e recoñecidos, que contribuíron a que a música tradicional e os instrumentos populares formasen parte do noso ser como pobo.

Os Melidaos pretenden poñer en valor a cultura galega, dignificar a nosa música e acadar o fin último da mesma: A diversión do pobo.

Os membros dos Melidaos son:

* Marcelino Vázquez- gaita
* Pepe Taboada- clarinete e gaita
* Pepiño Blanco- bombo e gaita
* Luís Casal- Tamboril e pandeireta
* Xele barrio- acordeón
* Antonio Raposo- gaita e voz

O acto de presentación do disco durou unha hora, pero a festa posterior prolongouse noutras salas do edificio Multiusos durante máis de tres horas nos que todos os asistentes escoitaron novas pezas, cantaron e bailaron ao son da nosa música tradicional de Os Melidaos.