As nefastas críticas de Los Vengadores

Los VengadoresA película de Los Vengadores está a arrasar nas taquillas de todo o mundo, con 200,3 millóns de dólares recadados na súa primeira fin de semana nos EE.UU. (superando os 169,2 millóns da derradeira de Harry Potter), elevando moito o listón para a nova de Batman que chegará no verán. Nun principio non tiña pensado falar dela neste espazo, pero ao final, despois de atopar un par de críticas nefastas non puiden evitalo.
E non, non me refiro ao punto de vista de Pedro Angosto Muñoz, que pese a ser polémico, non deixa de ter razón en moitos dos detalles que apunta, pois é de xustiza dicir que o filme baséase no Ultimates moito máis que en The Avengers. Dito doutro xeito: buscar fidelidade co cómic é ridículo. A película non adapta o cómic de Los Vengadores, senón que continúa as anteriores películas da Marvel. Nin máis nin menos. E para min é dabondo, pois estamos ante unha obra que entretén pese á súa duración (non entendo por qué a película dura máis de 2 horas, cando podía contarse toda a historia en 90 minutos sen omitir partes esenciais).

Logo, ¿que foi o que me molestou? Pois a achega que fixeron á película dende a Cadena SER, onde omiten todo rigor á hora de abordar a que podería ser a película máis taquilleira do ano.

Iron Man e o Capitán América en Los Vengadores
Dá vergoña allea escoitar a candidade de pifias que soltan ao falar de Los Vengadores na SER: levan mal a conta do número de películas por personaxe (¿Iron Man 3?), din que o Joker era Heather Graham (¿non quererían dicir o actor Heath Ledger en vez da actriz de Austin Powers. La Espía que me Achuchó?), confunden a S.H.I.E.L.D. con The Shield, comentan que na nova de Batman sae Kaine (que é un personaxe de Spider-Man… na de Bats o que sae é Bane)… ¡Menos mal que ao programa convidaron a sabios do cómic!

Podedes escoitar o corte de La Ventana a continuación:

The Hulk en Los Vengadores
Cando menos acertaron ao apuntar que o parecido de Hulk co actor que o interpreta está moi logrado.

Pero a cousa aínda pode ser peor, e se non, mirade a crítica que fai Pumares da película:

Se substitúes o título de Los Vengadores polo de calquera outra película terías unha crítica igualmente válida. Ata parece que Pumares non foi ver o filme, pero cando menos serve para botar unhas risas :D

Agradezo que falen de películas de superheroes nos medios, pero agradeceríase un pouco de respecto para os millóns de persoas que gozamos destes títulos. É como cando no xornal lemos como sinopse dunha película que é outra de Steven Seagal, Van Damme ou Jackie Chan, cando calquera deles ten filmes coidados e entretidos e auténticos putruños. Cando recorremos á crítica queremos información e non recheo.

Comentarios

comentario/s

 
Comments

pois mira oh! o outro día meu sobriño de once anos pediume de favor ir vela! eu que non gosto en prinipio de pelis así, pensei: mimadriña de dios o que hai que facer por un sobriño! e fun, e gustoume. Sí, gustoume moito. Dos criticos eu diría como Hulk: Dioses a mi, zas!

Momentazos: hulk é o millor sen dúbida, o mellor dos superheroes! o momento no que o prota de parís texas sae na nave industrial co doutor en bolas, é mortal, facía moito que non vía ese actor!

Si, o momento Hulk é moi bo (na sesión á que fun eu escachou coa risa todo dios), pero eu quédome cos comentarios de Tony Stark, que incluso estivo máis ocorrente que nas películas de Iron Man.
O que non acabou de encaixar ben foi a presenza de simples humanos loitando a pé de rúa ante unha invasión extraterrestre (a Viuda Negra coas pistolas víase ridícula, e incluso o Capitán América pintaba pouco ante os poderosos Hulk, Thor e Iron Man).
Iso si, o que demostrou a película é que aínda é posible arrastrar á xente en masa aos cines (incluso lonxe do Nadal e do verán), e que Marvel está a saber coidar ben os seus produtos para poder seguir a facer cartos con eles durante moitos anos, pese a que as vendas dos comics só son unha sombra do que eran hai 15-20 anos.

Vengadores????? ¿Donde está Emma Peel?

Para Avengers os da serie de animación, é flipante como acomenten revisións de personaxes clásicos dunha maneira fresca pero respestuosa co orixinal. No último episodio emitido nos USA fan una revisión da mítica Saga de Korvac de Jim Shooter e George Pérez!!!!

P.D. Botalle un ollo a este video:

http://www.youtube.com/watch?v=I8aKjZP89v8&feature=related

The Prize, The Prize….

Si, a serie de animación é unha pasada, pero ese tipo de produto é moito máis seguro como serie de televisión (barata e de produción rápida), mentres que ao meter centos de millóns nunha película os estudos non queren arriscar.

Comentarios nativos pechados (pode comentarse mediante Facebook).

Política de privacidade
(para comentarios anteriores
ao 26 de maio de 2014)