A imaxe estereoscópica coñecida vulgarmente por 3D (pese a non selo) leva moito tempo entre nós, pero o fenómeno da película Avatar e dispositivos como a Nintendo 3DS están a levar a moitas compañías a avanzar neste ámbito, entre as que destaca a surcoreana LG, que por unha banda presume da súa tecnoloxía Cinema 3D que consiste en lentes pasivos nos seus televisores (que son máis lixeiros e baratos que os lentes activos) e do seu móbil LG Optimus 3D, que incorpora unha tecnoloxía semellante á da Nintendo 3DS, con 3D sen lentes, coa vantaxe de que a súa cámara permite tirar fotografías e gravar vídeo con tal tecnoloxía (aínda que moitos preferirán destacar a súa incrible potencia), o que inspirou unha campaña publicitaria en Francia que pode dar que falar:

Facer anuncios cun bandullo e cunhas orellas prominentes pode resultar gracioso, pero cando teñen que tirar do recurso das tetas… un xa non sabe se pensar que os creativos de Y&R son uns xenios ou simplemente quedaron sen ideas.
En España Vodafone (a compañía que venderá o terminal durante o verán, agardándose que no outono faga o propio Orange) tamén optou polo humor para dar a coñecer o teléfono, e parece que nos vindeiros meses imos ver terminais semellantes de HTC e Samsung, o que podería abrir o debate sobre se as 3D son necesarias ¿e inevitables? ¿Será unha tecnoloxía que vén para quedar? ¿Ou será unha simple moda?

Quedei un chisco impactado hoxe (¡ignorante de min!) ao ver a nova sobre as Festas de María Pita que publican en La Voz de Galicia:

O nome da banda de Luis Tosar (que actuará o 17 de agosto na Praza de María Pita) está deturpado na edición impresa e na dixital, por partida dobre, aparecendo aparece como Di Ellas (no pé de foto) e Di Elas (no texto). El acabose. Dis Is Di End.
ACTUALIZACIÓN: Como pode verse nos comentarios, a banda de Luis Tosar, Piti Sanz, Iván Laxe, Suso Alonso e Ro Muñoz responde agora ao nome de Di Elas.

Curiosidade aparte, ao final non vexo que as festas deste ano sexan moito peores que en anos anteriores. Vaia, que coido que xa hai bastantes anos das grandes actuacións no Orzán de The Cure, Simply Red ou Joe Cocker, aínda que non me importaría que volvesen a repetir algún concerto de tal nivel na praia (de feito, tampouco vexo que estean a destacar os concertos de pagamento no Coliseum).

E para despedir o momento nostáxico-rosmón, supoño que estaría ben pór un par de vídeos de The Ellas aínda que só sexa para mandar unha forte aperta a Piti Sanz:

My Name Is Luca é o tema de referencia de The Ellas, pero non podo rematar sen pór parte da actuación da formación musical na Sala 600 de Melide:

Esta semana está a resultar dixitalmente intensa para o xornal La Voz de Galicia, pois o pasado xoves botou a andar a plataforma de distribución dixital Kiosko y más, de xeito que podemos acceder a unha versión en PDF enriquecida do xornal galego dende a web ou dispositivos como o iPad pagando 0,79 euros/exemplar o 9,99 euros/mes, converténdose nunha opción moi práctica especialmente para os que viven fóra de Galicia e queren estar ao día do que acontece aquí; e onte a través de Twitter adiantaban o seguinte:

Dado que A Voz xa ten a súa discografía en iTunes, poucas alternativas quedaban, e esta tarde confirmaron que xa era posible acceder á novidade dixital que pode descargarse en segundos.

E si, xa está dispoñible, o que parece que será un paso que van a seguir outras publicacións galegas nos vindeiros meses. Resultará moi interesante saber se esta iniciativa ten boa acollida en Galicia (non podemos esquecer que o dispositivo ao que vai dirixida ten unha distribución moi reducida) e se iso facilitará o futuro dos medios impresos nun formato semellante ao actual.
Para non estragarlle a moitos a sorpresa, non comentarei máis hoxe, e xa mirarei de falar do asunto con profundidade máis adiante.

En novembro chegará á Xbox 360 un novo xogo dos coellos tolos de Rayman que fará uso de Kinect (teño bastantes ganas de probalo, pois este tipo de xogos tenden a ser tan chorras que fan graza) e para ir creando expectación non tiveron mellor idea que parodiar a estrea cinematográfica desta semana:

Aproveito para comentar aos seareiros máis fieis da saga de J. K. Rowling que esta tarde moitos cines programan unha sesión dobre coas dúas partes de Las Reliquias de la Muerte (ou sexa, que pola noite é posible ver a película que o resto dos mortais irán ver a partir do venres).

Esta mañá tivo lugar na sede da Compañía da Radio-Televisión de Galicia un acto de presentación da súa nova páxina web, que superou a súa fase de proba iniciada o pasado 16 de maio (en Código Cero falamos do tema no seu momento, reproducindo tamén unha entrevista radiofónica coa responsalbe do novo espazo, Esther Medina).
A condución do evento correu a cargo de Beatriz Manjón, que non evitou soltar algunha que outra cuña ao seu programa A Revista Fin de Semana.
Xa metidos en fariña deixou a Esther Medina, nai da criatura, para que comentase o que supón a renovación da web da Galega.

Medina comentou a vocación de servizo da nova web, repasou os seus novos apartados e destacou o seu formato multisoporte, ou sexa, que agora non queda limitada a reprodución de audio e vídeo a ordenadores con Windows, senón que tanto dispositivos con outros sistemas operativos e mesmo trebellos móbiles (iPhone, iPod Touch, iPad, móbiles con Android…) poden acceder aos contidos da nova web, o que no caso dos vídeos tamén redunda nunha mellora da calidade que é moi de agradecer (ver a TVG no iPad é unha gozada).

Fíxome certa graza que durante a presentación da nova web aparecesen imaxes do programa Land Róver, nas que figuraba en primeirísimo plano Falete, que ultimamente está bastante de moda por ser unha das figuras de referencia en Twitter (cando non hai nada que contar, moitos fan coñas a costa de Falete, Shakira ou Belén Esteban).

Para destacar a utilidade da páxina web da CRTVG recolleron unha serie de videoconferencias con declaracións de usuarios do espazo virtual dende fóra de Galicia, sorprendéndome que un deles (o da imaxe) asegurou que gustaba de ver a TVG pola Internet para saber da terra dos seus pais: ¡Melide!

O director xeral da CRTVG, Alfonso Sánchez Izquierdo, tamén interviu no acto, destacando o peso que a sección de Deporte ten na web, o que contribuíu ao importante crecemento que tivo a CRTVG en relevancia na Rede. Actualmente é a 9ª páxina web galega segundo Alexa, o que mellora as declaracións de Izquierdo (quen comentou que pasaran nos últimos meses do posto 25 ao 15).

Fíxome especial graza ver que entre o público estaban caras moi coñecidas para os espectadores da TVG como Xosé Ramón Gayoso e Xosé Manuel Piñeiro, curiosamente xunto a outro Xosé (Mª Fdez. Pazos), polo que para completar a galería de estrelas da Galega só faltan Son Goku e Magnum

Pechou o acto Aid, a rapeira viguesa que poucos meses atrás actou en Melide, e ten temas como o divertido Boogie Vigo:

Coa frase de soy la 5ª digievolución de MC ata parece un rap de El Porta