Non sei se os de Los Alguien Producciones están ben da cabeza (principalmente por non aproveitar comercialmente o éxito do seu videoclip), pero o peor de todo é que tras ver o vídeo non hai dios que quite a canción da cabeza… ¡merda!
NOTA ROSMONA: Alguén debería dicir a esa xente que a rede Internet, de ter xénero, sería feminino.
Descoñecía que o actor Robin Williams era tan friki que puxera de nome Zelda á súa filla polo videoxogo protagonizado por Link, pero vese que os de Nintendo escoitaron a curiosa anécdota e decidiron aproveitala para o anuncio televisivo que acompañará a The Legend of Zelda: Ocarina of Time 3D que chega este venres ás tendas para a Nintendo 3DS:
O anuncio é divertidísivo, e tamén podo confirmar que o xogo é unha pasada (probei a demo hai 3 meses), converténdose con toda seguridade no primeiro vende-consolas para 3DS (unha mágoa que non fose un xogo de lanzamento) e que chega xusto no ano no que a saga de Zelda fai 25 anos, deixando claro que algúns imos vellos, e que conceptos como Super Mario, Donkey Kong ou Zelda son tan bos que poden manterse no tempo como clásicos modernos.
A Nintendo 3DS está a tardar en calar, pero co novo Zelda e os xogos que van chegar de cara ao Nadal (como Kid Iccarus: Uprising, Mario Kart e Super Mario) parece seguro que vai ser toda unha supervendas. Aínda que hoxe non vexamos moitas 3DS polas rúas, apostaría algo a que 2012 vai ser o seu ano (especialmente se rebaixan algo o seu prezo ou inclúen algún xogo con certo pulo ao adquirila).
Onte, ao sairmos da gravación do programa de radio Banda Ancha comentáronnos que acababan de recibir unha nota de prensa na que a Policía anunciaba que viña de «desarticular a cúpula da organización hacktivista Anonymous en España», ao que reaccionei con estupor. Entendín que estaban a interpretar mal a nova, pero cando puiden ler o comunicado oficial quedei a cadros. ¿Cómo é posible que se identifique a cúpula dunha organización que nin ten membros fixos nin está xerarquizada?
Algún responsable da Brigada de Investigación Tecnolóxica (BIT) tiña delirios de grandeza, e quería compara a Anonymous con ETA, o que non ten ningún sentido, pois considerar que o vandalismo na Rede é un acto terrorista é perder totalmente a perspectiva da realidade.
A cousa era tan surrealista que en pouco tempo xa podían lerse en Twitter comentarios coma o seguinte, no que se refire á famosa cúpula:
Para rematar que cagala, aos responsables da BIT non se lles ocorreu outra cousa que dar unha ridícula rolda de prensa na que quedaban como auténticos ignorantes:
Que un dos policías comece confundindo DoS con SOS xa é a hostia, e que o mesmo fulano salte comentando que se a alguén dos Anonymous volve facer algo na Rede vano estar a vixiar xa é totalmente absurdo. Lembra a eses comentarios que se facían hai anos de que «a Policía non é parva», pero o problema é que con representantes así ¡paréceo! Eu non me sinto nada seguro, especialmente ao ver que están a presumir dunha auténtica chuminada. Segundo eles mesmos comentan, aínda non se demostrou nada (¿cómo é que a palabra presunto non aparece nin unha única vez no seu comunicado?), e o famoso servidor desarticulado non é un potente equipo dende o que se lanzasen ataques a escala global, senón a hospedaxe ¡dun chat! Non é que os de Anonymous vaian a montar outro servidor de chats mañá, ¡é que hai chats a milleiros por todo o mundo aos que poden recorrer para intercambiar comentarios! Ou sexa, que a grande operación policial non é máis que unha anécdota.
O que entendo de todo isto é que un policía infiltrouse nun dos chats de Anonymous, o que é sumamente doado, pois non esquezamos que trátase dun grupo aberto e moito menos anónimo do que dan a entender (distintos medios publicaron entrevistas a membros do colectivo nos últimos meses), e recompilou información para intentar identificar a alguén dos que lanzaban ataques distribuídos a certos obxectivos. Finalmente identificaron ao responsable do chat (que é moi posible que saia impune do asunto por limitarse a ser un prestador de servizo da Sociedade da Información) e a 2 participantes, e está por ver que cheguen a demostrar a súa responsabilidade nalgunha intrusión informática. Ou sexa, que ao final é moi posible que todo queda en nada, como todas esas operacións nas que pechan páxinas de P2P e despois os xuíces determinan que non existe delito algún. As forzas de seguridade do estado están a facer un ridículo espantoso na comunidación do seu traballo, dando a imaxe de contar con Mortadelo e Filemón nas súas filas.
Non me cabe dúbida de que teñen que contratar a un asesor de imaxe xa, especialmente despois de que o comisario da BIT da Policía Nacional fixera un ridículo espantoso ao aparecer en público portando unha máscara de V de Vendetta incautada, o que valeulle múltiples retoques fotográficos moi merecidos:
¿Imaxinades unha rolda de prensa sobre unha detención de etarras nos que aparecese un guardiacivil cun pasamontañas na man como proba? ¿Non sería ridículo? Pois se miramos o material que incautou a Policía Nacional aínda podemos botar unhas risas:
Suponse que a Policía incauta o material relativo á execución de supostos delitos pero, ¿entón por que fanse cunha simple careta que o único que fai é representar unha ideoloxía ou incluso o gusto por un cómic ou unha película? Vou comentarlle ao meu amigo David que teña coidado coa súa máscara de Guy Fawkes, non vaia a entrarlle a Policía na casa por sospeitar que é un membro de Anonymous.
Tamén é bastante absurdo que consideren a un dos detidos un perigoso hacker con grandes coñecementos informáticos porque descubrion que na súa casa había un exemplar da revista @RROBA (todos sabemos que para aprender a lanzar ataques informáticos en vez de buscar información na Internet vas ao quiosco).
Se se deixasen de caralladas e perseguisen á xente que comete delitos serios na Internet estariamos todos máis tranquilos. Tamén estaría ben que para falar en público, en vez de pór a xefes que non saben do que falan, deixasen aos profesionais de verdade falar do seu traballo. Non é a primeira vez que vexo a un ente público (e tamén a algunha empresa) facer o ridículo por deixar falar en público nunha presentacion ou nun congreso a un director que fala de oídas.
O pasado xoves o programa A Solaina da TVG tivo certo carácter melidense, e tras unha chamada telefónica dun veciño da vila, achegáronse ao convento dos Padres Pasionistas para dar conta do seu peche por mor da falta de vocacións:
Entendo que os veciños fagan comentarios nostálxicos sobre o convento, pero hai que recoñecer que non é algo que sexa diferente, por exemplo, ao peche dun cine, e en boa medida tamén somos os cidadáns os que provocamos ese tipo de peche, xa que deixamos de acudir a moitos locais.
No convento dos Pasionistas non só había poucos padres, senón que de fregueses tampouco ía ben a cousa (coido que esaxeraron bastante ao comentar que a metade da vila fixo a Primeira Comuñón alí), como está a acontecer co resto de establecementos relixiosos. Actualmente é máis doado ter un rabaño de fieis ao redor dunha discoteca que nunha igrexa. É o signo dos tempos.
Cando menos este tipo de acontecemento levan á xente a lembrar tempos pretéritos (así como a agradecer o traballo que fixeron os padres todos estes anos), e a valorar mellor o que agora se ten, que non é pouco.
Quixera aproveitar a ocasión para agradecer ao padre Rosendo todo o que fixo pola mocidade da vila, dinamizando a vida cultural local ao organizar obras de teatro ou mesmo coa coordinación a revista do Instituto (Intres) que tanto tivo que ver coa miña actividade profesional actual.
Favorite
Retweet
Reply
