Isto non é Grenlandia, nin falta que fai (comentarios sobre o rexistro de dominios .gl dende Galicia)
A semana pasada a empresa galega Dinahosting lanzou unha campaña para promover o uso do dominio de primeiro nivel .gl coma se correspondese a Galicia (cando pertence a Grenlandia), posto que conseguiron converterse en rexistradores deste tipo de dominios (proceso que ata o momento había que facer a través de Tele-Post). Chegados a este punto teño que matizar varias cousas:
1- Dinahosting é unha empresa galega que recomendo en moitas ocasións para hospedar páxinas web polo mero feito de que son locais
2- Entendo totalmente que Dinahosting queira mellorar o seu negocio da venda de dominios da Internet (que tamén dá certo pulo á contratación de hospedaxes)
3- Gusto da idea de que poida facerse o rexistro dun dominio .gl a un prezo competitivo e a través da Rede (o mecanismo establecido por Tele-Post era off line).
Entón, ¿por qué o pasado xoves escribín un artigo en Código Cero criticando esta iniciativa de Dinahosting? Pois simplemente porque estaba a recibir consultas de particulares e profesionais sobre qué facer cos novos dominios, ou sexa, que en poucas horas había xente preocupada por ter que decidir se contratar unha chea de dominios coas súas marcas ou coas dos seus clientes. Quixen deixar claro que o .gl non ten nada que ver con Galicia, e ilustrar dun xeito moi básico os problemas que ten utilizar un ccTLD (dominio de primeiro nivel asignado a un país) para o que non é. Falo dunha problemática moi real, á que están suxeitas moitas páxinas web do mundo, pero que se un está ben informado é libre de elixir adquirir un dominio .gl (de feito, hai anos que pode facerse) pagando 37 euros/anos (prezo que reitero que é moi competitivo).
Agora tócame admitir que ao pór en marcha este blogue tiña pensado contar con dúas versión, unha .es en español e outra .gl en galego (en serio), pero finalmente decidín pasar do dominio groenlandés porque deume a impresión de que a coña non ía pillala ninguén, e continúo a pensar o mesmo: existe un motivo para os nomes de dominios da Internet, e se pasamos de todo só contribuímos ao caos.
ccTLD e gTLD
Cando comezou a funcionar a Internet entenderon que era preciso crear un sistema de nomes de dominios para organizar xerarquicamente os contidos na Rede, e así ordenalos dalgún xeito, creando por unha banda os dominios de primeiro nivel xenéricos (gTLD) coma os .com para empresas, os .org para asociacións, .mil para o exército, .edu para universidades (e outros contornos educativos), entre outros, e por outra banda os dominios de primeiro nivel correspondentes a países (ccTLD), que distínguense por ter só 2 carácteres, de xeito que cando un dominio remata co sufixo .es entendemos que é español, un .fr é francés, un .pt portugués… A principal peculiaridade dos ccTLD é que o seu regulamento e xestión están descentralizados, polo que cada país foi á súa bola, e nalgúns casos os rexistros están totalmente abertos ao estranxeiro e noutros é preciso cumprir certas condicións. Dado que as normativas dos distintos dominios nacionais son variables, operar con dominios estranxeiros supón un risco, e no caso groenlandés o risco aínda é maior, pois dado que é un país sen estado, incluso sería posible a súa desaparición no futuro, coma aconteceu no seu día con Checoslovaquia (.cs) ou Zaire (.zr). Ou sexa, que os cambios políticos poderían ter efectos a longo prazo no .gl (aínda que non sexa probable).
Os ccTLD desígnanse en función da norma ISO 3166-1, que non é estática (nin séguese de xeito estrito), e precisamente por iso tamén podería ser posible que perigase o .gl (poderían incorporar a Grenlandia no Reino de Dinamarca, ao que pertence administrativamente).
Abuso dos nomes de dominio
Algo que teño que deixar claro é que o que penso dos .gl tamén o aplico a outros nomes de dominio. Paréceme lamentable que haxa canles de televisión que pillen un .tv, emisoras de radio que rexistren un .fm, cataláns que pillen un .ca ou un .gi (en referencia este último a Girona), .tm coma marca rexistrada ou xente que empregue o sufixo .to para facer xogos de palabras co inglés tipo go.to.
De feito, o caso dos .tv é todo un exemplo de risco, e hai rexistradores que os eliminaron do seu catálogo ante o seu risco, dado que pertence á illa de Tuvalu, da que está a fuxir a súa poboación a Nova Celandia porque está a afundirse (a poboación vive e menos de 2 metros sobre o nivel do mar, de aí que uns 4.000 tivesen que emigrar pasando a seren considerados refuxiados ambientais). Vaia, que algunhas compañías non queren ter problemas cos seus clientes se dentro duns anos os .tv deixan de existir, pois poderían esixirlles responsabilidades.
Polo momento a desaparición de nomes de dominio de primeiro nivel é algo anecdótico, pero temo que nos vindeiros anos a cousa vai cambiar, e non teño nada claro que sobrevivan moitos dos dominios esponsorizados que están a crearse, de aí que unha empresa debería pensar ben na súa estratexia na Rede a longo prazo, pois aínda que sexa relativamente doado mudar dun dominio a outro na web, non é tan sinxelo o proceso cos enderezos de e-mail (eu continúo a recibir mensaxes lexítimas en enderezos que levo anos sen utilizar para remitir correos, pese a avisar de que xa non os usaba).
Por suposto, para un dominio que non pensa durar varios anos nin crear marca, todo isto podería obviarse, polo que hai que entender que a miña mensaxe de sentidiño non vai para todo o mundo, senón principalmente para empresas e proxectos na Rede.
Respondendo aos comentarios
Lendo os comentarios que hai na web dá a impresión de que eu son a única persoa crítica co .gl, pero podo asegurar que en certos ámbitos o meu parecer é o maioritario. Quixera aproveitar para responder a algunhas cousas que apareceron en distintas páxinas web coma en Fraggle Blog, onde o autor asegura que a iniciativa de Dinahosting é «de las más inteligentes que se ha llevado a cabo para manifestar la necesidad de un TLD propio», o que eu vexo xusto do dende a perspectiva contraria: se aceptamos utilizar o .gl (un ccTLD alleo), ¿para qué un dominio de primeiro nivel propio?
Tamén defende que o .gl é a «única opción», posto que non é posible rexistrar dominios .gz nin .gal, pero iso paréceme pouco atinado, pois incluso existe a opción do .ga e, de feito, o .gl sería unha alternativa aos gTLD e aos dominios .es e .eu. De feito, nos últimos anos certas consellarías que non gustaban do uso do sufixo español optaron polo dominio europeo que tamén soa moi galego. ¿Verdade?
Pero onde meten a zoca no Flaggle Blog é ao falar das marcas. Para comezar, as primeiras fases de rexistro de novos dominios non é especulativa (normalmente sae ao mesmo prezo) senón que buscan protexer marcas para evitar problemas ulteriores, e os «procedementos tremendamente efectivos» que ten a ICANN ante os conflitos con nomes de dominio precisamente non son de aplicación en Grenlandia. Para rematar tamén engaden que no caso de desaparecer Grenlandia coma país a ICANN faríase cargo do seu dominio, o que non é así, e precisamente están os casos de Checoslovaquia e Zaire para demostralo (ICANN dá prórrogas pero non mantén dominios de países desaparecidos). Amais, e non referíame só á desaparición de Grenlandia, senón a posibles cambios que poidan levar á imposibilidade de manter dominios alí.
En Chuza (agora Chuza.gl) tamén hai comentarios aos que debo responder, en boa medida porque incluso van contra a miña persoa, chegando a dicir que as miñas apreciación son destrutivas porque coma tesoureiro do PuntoGal vería perigar o meu status. ¿Mande? ¿De qué status falan? A miña pertenza á Asociación PuntoGal é altruísta, e coma todos os socios, incluso estamos a perder tempo e cartos por traballar a prol dun dominio galego na Internet (coido que o tal coleguita descoñece que cando o .gal sexa unha realidade a Asociación PuntoGal desaparecerá coma tal, pois é unha organización finalista, de xeito que non temos intereses escuros).
E sobre a posibilidade de que houbese problemas para rexistrar dominios .gl no futuro podería lembrar casos de países que obrigan a que os rexistradores teñan sede no país e cousas polo estilo, ou sexa, que os responsables do .gl poderían cambiar a súa normativa de funcionamento, especialmente se rexistrasen un volume importante de dominios estranxeiros, e o político do momento considerase que iso lesiona a identidade groenlandesa.
Derrelicto tamén pensa que o meu texto en Código Cero está provocado porque estou no «contorno do PuntoGal» e podería ser unha «opinión interesada». Coido que expliquei bastante ben os meus argumentos, á vez que debería matizar que en ningún momento falei coma representante da Asociación PuntoGal (polo que o feito de que mencionasen en A Nosa Terra a miña pertenza á Asociación ao falar do meu texto en Código Cero pareceume pouco atinado), que por outra banda non ten unha postura oficial nin a favor nin en contra do .gl.
Posiblemente o mellor que lin en Chuza estes días foi o comentario de Peeler, quen di que «empregar o .gl é só outra opçom para poder escolher, nom é para andar a navalhadas entre nós umha vez máis».
¿Malas maneiras?
Posiblemente toda esta polémica non tería lugar se non fose polo xeito no que Dinahosting anunciou a súa oferta de rexistro de dominios .gl, pois foi moi agresivo, xa que non só obviaron á Asociación PuntoGal (á que pertencen, e que celebra Asemblea Xeral o vindeiro venres), senón que realizaron un rexistro masivo de dominios .gl co nome de cidades galegas, marcas e medios de comunicación, o que dende o blog da compañía din agora que era para evitar «usos malintencionados» e aseguran que non van quedar con eses dominios e que están a contactar cos propietarios das distintas marcas para transferirlles os dominios. A min iso chéirame fatal, e supón unha mala práctica, que foi a peor ao activarse redireccións de dominios coma xunta.gl ou farodevigo.gl aos seus dominios .es, dando a entender que a Xunta de Galicia e o Faro de Vigo son usuarios de dominios .gl cando estes pertencen a Dinahosting.
Nun principio non debería haber problemas por todo isto, pois entendemos que Dinahosting non está a actuar de mala fe, pero visto dende fóra pode percibirse coma unha extorsión ou incluso publicidade enganosa. De feito, vexo moi complicado que a Xunta de Galicia ou os distintos concellos dos que Dinahosting ten o seu correspondente dominio .gl vaian rexistrar un nome de dominio deste tipo, pois parece bastante difícil de xustificar que subscriban un servizo dependente dun país estranxeiro. As multinacionais tenden a rexistrar todos os dominios relativos ás súas marcas, pero iso non ten sentido no caso dos entes públicos, que están ben identificados na Internet, e están legalmente amparados polo regulamento do .es e o .eu (entre outros).
Dende Dinahosting deberían ter actuado con máis de tino, pero supoño que pasado certo tempo quedará todo nunha anécdota, e co que quedaremos é coa opción de poder mercar un dominio .gl se o consideramos conveniente. Hai galegos con certo rexeitamento a utilizar un nome de dominio coma o .es, e poden atopar acubillo baixo o dominio .gl mentres non exista un .gal, aínda que é moi posible que a oferta dos dominios groenlandeses poida supor unha confusión para os usuarios que non saiban destas cousas, polo que pola miña banda preferiría que non desen tanto bombo a estes dominios, especialmente porque cando estean en funcionamento os dominios .gal, a empresa máis beneficiada vai ser sen lugar a dúbidas Dinahosting, á que apostaría que van ir parar máis do 90% dos rexistros (de aí que non entenda as declaracións que fixo hai uns meses Paulo Rodríguez falando da «nosa señora da subvención» o que todo o mundo entendeu coma unha apreciación moi pexorativa relativa á Asociación PuntoGal).
En definitiva, que os que queiran rexistrar un dominio co sufixo .gl teñen agora unha opción cómoda e barata, aínda que eu non recomendaría tal práctica por motivos que podedes ou non compartir comigo.
Trackback URL | RSS Feed de comentario | Enlace entrante |
| 
| Compartir
18 comentarios realizados
1. Berto Yáñez escrito o 23 de Marzo de 2010 ás 22:17
A min chamáronme o xoves pasado de Dinahosting, unha empresa coa que teño relación profesional hai tempo sen queixa ningunha, para comentarme que van comezar a vender dominios .gl.
Entre as súas estratexias de promoción fixeran unha pre-reserva de dominios correspondentes a empresas, institucións con presencia relevante na rede galega e outras webs coñecidas por calquera razón. O obxectivo desa reserva era pasarlle o control completo do dominio a esas entidades pagado durante un ano.
Aceptei o agasallo moi gustosamente. Non sei se todas as entidades o aceptaron nen como foi o proceso. O caso é que o luns recibin un mail onde se me indicaba como acceder á configuración do dominio. Dentro do panel de control mudei os contactos ao meu nome e redirixín as DNS a rimuhosting, proveedor onde teño aloxada chuza dende hai anos. Xa no servidor de chuza fixen as moficiacións necesarias no .htaccess, mudei un par de links que non eran relativos e aos 10 minutos chuza.org convertiuse en chuza.gl.
O cambio fíxeno, como xa dixen, a nivel de servidor web polo que todas as antigas urls .org redirixen automáticamente a súa versión “.gl”, a redirección é de tipo 301 (Moved Permanently) polo que os buscadores tan pronto visiten de novo a url actualizarán o seu rexistro. Onte tiña máis de 30.000.000 de resultados indexados en google buscando por site:chuza.org, hoxe xa teño máis de 20.000 buscando por site:chuza.gl, en calquera caso, as dúas versións son válidas.
A estas alturas da noite (son as 22h) non noto unha diferencia significativa coas visitas de onte, de feito non creo que a note, pero aínda que ocurrira só pasaría maioritariamente en visitas “de rebote”, que no meu caso, ata agradecería para aliviarlle un pouco a carga ao vello Debian Sarge que aguanta chuza
Non, non vou entrar a a valorar o que comentas no post, pero este parecíame un sitio axeitado para comentar a experiencia da mudanza. Apertas!!!1
2. Certo escrito o 23 de Marzo de 2010 ás 22:46
Pois non atopamos ningunha razón de sentido común para non rexistrar dominios co .gl. As televisións tampouco son de Tuvalu (non coñecemos a ningunha dalí) e estas illas infláronse a vender dominios rematados en .tv
O titular de que “Isto non é Grenlandia, nin falta que fai”, parécenos incluso banalizar ata o infinito o mesmo cerne de Internet. Se a Rede non fose global non estaríamos nin a falar desta teima.
Nós xa somos un pouco grenlandeses. A Terra Verde ten un sufixo que nos interesa e que Dinahosting nos achegou sen apenas complicacións. Temos visto facer irmanamentos entre concellos por bastante menos…
3. Odemo escrito o 23 de Marzo de 2010 ás 22:54
Olá, sou um usuário qualquer que quer registrar um domínio que os meus clientes/leitores liguem facilmente com Galiza. Pode-me indicar qual é a melhor opçom?:
- Aguardar 3-5-10 anos a que a ICANN atenda essas cousas, conceda a gestiom dos domínios, etc…
- Colher um .es, total… [ou org ou com ou .MEGALOL]
- Colher um dos “tam” populares .eu.
- Colher um .gl …
Com carinho.
4. Odemo escrito o 23 de Marzo de 2010 ás 23:02
Olá, sou o usuário de antes. E agora também quero escolher um domínio que tenha algum valor simbólico, e que poda achegar algum tipo de sinergia com o projecto (parece que a muito longo prazo) do .gal, mostrando o interesse por pessoas e empresas galegas por um domínio diferenciado.
GRASIAS DE ANTEBRASO:
5. Marcus escrito o 23 de Marzo de 2010 ás 23:22
#1 Berto, graciñas polo teu comentario. Gusto de saber que a xente de Dinahosting tivo certa deferencia con Chuza, pero entenderás que critique que rexistrasen chuza.gl sen o teu consentimento previo (é unha cuestión de formas).
Iso si, o cambio de nome de dominio de Chuza foi coma un foguete (só notei problemas durante a primeira hora).
#2 O titular foi unha arroutada (non sei por qué, pero estes días escoitei bastante certa canción dos Zombies e despois de escoitala pasáronme pola cabeza temas coma o de e crucei conceptos
Reitero que a min paréceme mal que as canles de televisión rexistren dominios .tv. Se queren facelo, alá eles (o mesmo conto para os .gl).
#3 Actualmente non existe a posibilidade de rexistrar un dominio identificado con Galicia, e precisamente por iso existe a Asociación PuntoGal, para poder termos unha identidade na Rede.
Optar polo .gl ten o mesmo sentido que optar polo .ga. Cadaquén pode facer o que lle pete, pero eses ccTLD teñen unha finalidade, e non vexo nada positivo de abusar deles, e non os recomendaría para ningunha empresa nin entidade (para uso persoal xa sería outro cantar).
6. Pepe escrito o 24 de Marzo de 2010 ás 0:22
http://www.youtube.com/watch?v=VbF1phW2xLI
7. Nemigo escrito o 24 de Marzo de 2010 ás 0:51
deixate de lerias marcus, téñente calado! Sábese que tes conta na suiza (.ch) alí levas os leuros a feixes! Ises que che pagan no .gal
Falando xa en pran lerias e lendo as irrelevantes aportación dos chuza(te) eu tamén postearei aportacións similares. Por exemplo: cando troque as rodas do carro
Non vexo problema en empregar .gl ten o seu punto cachondo, ata infantil. Máis infantil é que empresas de un ou ningún empregado teñan rexistrado un .com Lembremos tamén que non vai moito pra ter un rexistro .es había que coñer a algún ministro
.tv .biz hai alguén que memorice os dominios das páxinas? Veña se ata pra entrar no clon laranxa buscamos o enlace en google!
8. Sak escrito o 24 de Marzo de 2010 ás 0:54
Marcus, léote e non atopo cal é o problema do .gl, basicamente aludes á inseguridade de que sexa un ccTDL e levas razón. Pero para a maioría das marcas vai ser un dominio complementario, ou de non selo, pódese recomendar que teñan outro dominio. É dicir, que cunha mínima precaución xa está todo o problema resolto.
A respecto de .gl vs .gal penso que unha estratexia reafirma á outra, sobre todo cando o .gal precisa dun pulo extra. Todo o mundo é consciente que o .gl é un truque para ter un domínio que non nos dan, asique se nos dan .gal hai razóns de sobra para mudarse.
Refente a outros temas dos que falas:
- “O .gl non ten nada que ver con Galicia”, penso que nuns meses a afirmación estará desactualizada. Cando haxa moitas webs que teñan ese domínio veremos o que pensa a xente. Ademáis, é como afirmar que o .tv non ten nada que ver coas televisións; o uso real supera o uso asignado, cousas da vida.
- Dinahosting debería ter contactado con .gal e paréceme pouco considerado e ademáis un erro estratéxico non telo feito. O resto da actuación pareceume impecable, información clara a respeito da procedencia estranxeira do domínio e reserva de domínios sensibles. Non sei como che pode estrañar que reservaran os nomes de importancia na rede galega, con certeza se non os reserva dinahosting, reservaríanse por un particular en menos de 5 segundos, asique mellor que os teñan eles. Se despois fan mal uso deles xa os criticaremos, pero os apriorismos non veñen a nada.
- Respecto á perda do .gl por Grenlándia, pois dubídoo muito, xa que está ben máis perto de independizarse (e manter o domínio) que de integrarse (máis) en Dinamarca (e perdelo). O resto de inseguridades tamén son pouco probables e recórdanme aos que non apoian o .gal porque din que axiña se liberalizarán os domínios.
Con todo o aprecio e respecto que che teño, Marcus, e desde a máxima cordialidade posible, extráñame muito o teu posicionamento en contra do .gl sendo unha das persoas que máis tes traballado e demostrado o interese nun domínio galego. O .gal está moi lonxe, o governo galego non ten nen tivo interese real no .gal, asique o .gl xestionado por unha empresa de probada solvencia, paréceme a solución menos mala, pero sobre todo única solución posible.
Apertas e desculpa o ladrillo (que levarei reestructurado ao meu blogue)
9. Marcus escrito o 24 de Marzo de 2010 ás 1:34
#7 Nemigo, de feito si tiña unha conta no .ch, concretamente en home.ch, un servidor web de balde que era bastante popular nos tempos de Geocities
#8 Dis que e precisamente eu sosteño o contrario: a xente non controla destes temas, e a existencia de semellanzas entre o .gl e o .gal só crea confusión.
O da inseguridade do .gl é algo que depende de moitísimos factores, pero o máis importante e o tocante a marcas: unha marca groenlandesa non debería ter moitos problemas en arrebatarlle un dominio a un galego no caso de que poida levar a confusión. Ante ese tipo de conflitos estariamos indefensos. Vaia que a desaparición do .gl coméntoo coma un caso extremo (pero que poñan medidas para limitar o rexistro non sería nada sorprendente se os invadimos, algo que tamén dubido que pase).
O meu posicionamento paréceche raro, pero precisamente vén do meu traballo para conseguir un dominio galego. Se a xente usa o .gl, ¿para qué vai esforzarse en conquerir un .gal?
De todos os xeitos debería quedar claro que non teño nada en contra de Dinahosting (todo o contrario), e o que critico non é que fagan negocio (o que aplaudo) senón que sexan demasiado agresivos nas súas tácticas comerciais.
10. Camilo Regueiro escrito o 24 de Marzo de 2010 ás 1:57
Ola Marcus, acabo de ver tiñas unha entrada nova no blog, por medio de Chuza , xa tes unha entrada mais sobre ti en Chuza
, e vendo que incluso Berto opinou aquí, pois vou a atreverme a opinar eu tamén :).
Antes aclarar que tamén pertenzo á Asociación Puntogal, pero as opinións que vou verquer aquí son única e exclusivamente a titulo persoal, polo que en absoluto isto debe de ser tomado como unha postura da asociación que somos varios e diversos.
Indicar que o teu artigo paréceme moi atinado e concordo con moitas das ideas que expós, ademais quixera puntualizar algunha cousa a maiores….
Hai xente que se pregunta por que a Asociación funciona a base de subvencións. A explicación ven a partir do seguinte:
- Supoñendo que houbera empresas capaces de asumir o proxecto a nivel económico, iso suporía poñer o proxecto en mans dunhas empresas en concreto, cos seus propios intereses e lóxicas de negocio, licitas no ámbito mercantil (e sei do que falo) pero que faría que as diferentes entidades sociais, culturais e incluso o resto das empresas que non participaran, desconfiaran do propio proxecto, xa que se sospeitaria intereses empresariais polo medio (fose real ou non, pero xa sabemos como somos as persoas con orellas), sendo mais dificil acadar a maioría social de apoio que ten a iniciativa na actualidade, e que é absolutamente necesaria para que a Icann valore positivamente a iniciativa.
Un exemplo disto último que falo é a candidatura do .Berlin que levan tantos anos ou mais traballando coma a asociación PuntoGal para conseguir un dominio para a cidade de Berlín e agora mesmo está en perigo e con serios problemas por que non conta coa aprobación do Concello de Berlín. Outra é a do .BZH o Bretón, con moitas dificultades na actualidade a ese nivel.
- Outro dos motivos é que existen iniciativas de interese social e estratéxico (consideramos que ter un dominio propio o é) nos que se debería invertir, e precisamente para iso nos dotamos das administracións públicas, que non só están para pagarlles impostos, gustenos mais ou menos o goberno de turno.
Pódese estar de acordo ou non con este criterio, e ten prós e contras pero este é o criterio que se adoptou, pensando en que eran os mais axeitados. Podémonos equivocar?, claro, como calquera persoa que tenta facer as cousas o mellor posible, xa que aqueles que pensen que teñen a razón absoluta soen ter unha perspectiva da vida moi curtiña.
Tamén quixera expoñer dun xeito o mais didáctico posible o por que levamos esperando pola Icann tanto tempo para ter o noso dominio propio:
Imaxinemos que unha entidade (pública ou privada) convoca un proceso de seleción de persoal que nos interesa, e anuncia que en 6 meses abre dito proceso de seleción no que se precisa pasar un exame cunha serie de materias…. neste caso poriámonos a estudar para iso… pero pasados 3 meses esa entidade di que a convocatoria retrásase 6 meses mais que está a preparar o exáme aínda e nós que queremos acceder e ademais aproveitar o esforzo realizado ata o momento decidimos seguir estudando, e despois volve a adiar a convocatoria para outra data, etc..
A realidade é que non me adían a min o proceso por que lles caio mal - algo que teño visto en moitos comentarios pola internet adiante
- , senón que llo adían a todo o mundo.
Neste exemplo o PuntoGal sería o estudante que prepara a proba e a empresa a Icann que está a adiar o proceso. Non poderémos demostrar que estamos preparados ata que se abra a convocatoria, incluso cando se abra o exame vai ser difícil, pero estamos procurando poñer todo o noso esforzo niso.
Entendemos que a xente que non ten a información axeitada se desespere polo tempo que levamos nisto, e nós mais que ninguen sabemos dese sentimento.
Lembrar que ninguén da asociación cobra nada polo traballo que fai nela (vivimos doutras cousas), incluso ás veces temos posto da nosa parte, e claro cando fas isto que anden verquendo certo tipo de opinións gratuitas pois como que non resulta agradable. Ademais aqueles que se consideren capaces , mellores e con forzas para levar o Puntogal adiante poden presentar unha candidatura de directiva, e se son respaldados pola maioria pasarían a responsabilizarse do traballo.
O motivo de que a Icann estea a adiar o proceso é que queren que cando este se abra, haxa as suficientes garantías de que as diferentes entidades certificadoras cumplan unha serie de requisitos que garantan a propiedade de marcas mediante procesos de Sunrise (estes periodos non son unha carallada como tamén teño visto por aí), ou outros perfectamente regulados e que permitan que o dereito de usuarios, empresas e entidades, sexa respectado, e non que se permitan rexistrar dominios sin un minimo de garantias legais, xa que aínda que ditas marcas sempre poden entrar en procesos xudiciais con quen lles usurpa nomes de dominio para facer mal uso, isto requirelles unha inversión en avogados, procesos, etc.. que lles supoñen gastos que evidentemente queren evitar. As grandes marcas estan presionando á Icann para retrasar o proceso de novos dominios o máximo posible. Tamén queren evitar que alguén pida o dominio para un uso concreto e logo o empregue para outro diferente ao que solicitou.
Quixera aclarar que se o Puntogal sae adiante, este será un rexistro e non un rexistrador. Esta diferencia é importante. O rexistro é o que regula e resolve confictos, entre outros conflitos legais en base á xurisdición aplicable. No caso do Puntogal sería a entidade que se pense para xestionalo (tentaremos que sexa unha entidade sen ánimo de lucro, e tentaremos que sexa o mais plural e indepente posible, como no caso do .cat, ou o caso de TELE-POST falando .gl co que teñen o contrato os de Dinahosting) e como moi ben di Marcus non será a Asociación actual quen o faga, xa que esta ten como fin unicamente conseguir o dominio. Un detalle importante a saber é que A ICANN OBRIGA aos rexistros a que comercialicen os dominios por medio de empresas rexistradoras, como o caso de Dinahosting.
Sobre o tema do .gl dependerá en grande medida se é beneficioso ou perxudicial para o .gal do uso que fagan os de Dinahosting del, xa que se o xestionan mal e sen profesionalidade iso pode ser perxudicial para que os galegos/as teñamos un dominio propio, xa que crear problemas neste tema é dar argumentos en contra da necesidade dun dominio noso. Pola contra se o xestionan ben e con profesionalidade pode ser beneficioso. E cando digo o da xestión non é simplemente de que te proporcionen un panel chulo onde configurar o teu dominio, senon temas mais serios.
Falando disto non creo axeitado que “resevaran” de saída unha serie de dominios sen un criterio serio e profesional se era esa a súa intención. Un exemplo… reservaron o mesmo día da saída, ou sexa o 18 deste mes o dominio http://www.lavozdegalicia.gl (por certo La Voz debe de estarlles moi agradecida, e xa vexo que transpasaron a propiedade xa), e 4 dias despois rexistran (reservan) o dominio http://www.anosaterra.gl (este a día de hoxe aínda non esá traspasado), polo que cando menos durante 4 dias ANT estivo “exposta” aos malos usos aos que fan referencia no propio blog de Dinahosting. Outros como A Peneira ou o pgdalingua xa non mereceron ser reservados e cedidos. Outro caso… rexistran o dominio das principais cidades (Vigo, Pontevedra,etc..) pero non estan rexistrados os nomes das vilas pequenas (acaso estas merecen menos protección?). Toda esta información de rexistros está no Whois do nic do .gl accesible públicamente dende http://www.whois.nic.gl/
Pero en todo caso, que funcione ben ou mal o .gl é responsabilidade da empresa que os comercializa xa que é a que asumiu o risco desta aposta. Eu agardo que as cousas se fagan mellor que ata agora xa que todos nos beneficiariamos.
Por último, e non menos importante, dependerá dos obxectivos que se prantexen os propios directivos de Dinahosting a este respecto, que tal e como teñen declarado eles mesmos, o seu obxectivo non é perxudicar á iniciativa do .gal, e eu vou a confiar nesas declaracións mentres non se demostre o contrario. Si que é certo tamén que eu persoalmente botei de menos que cando menos nos comunicaran que ian a levar adiante a iniciativa, eu entereime polo correo masivo que enviaron a determinados clientes ofertandolle o novo dominio, xa que teño contratados varios servizos con eles a varios niveles.
Espero ter aclarado posibles dúbidas, sobre estes temas, e aquelas persoas que non teñan a suficiente información ou algún tipo de dúbida ou desconfianza sobre a Asociación invitolles a achegarse pola asociación e preguntar, que temos as portas abertas a todo o mundo e explicaremos con moito gusto e coa mellor das intencións o que se precise. Se ademais é unha entidade pertencente a asociación, ten uns dereitos dos que pode facer uso, igual que en calquera outra entidade sen ánimo de lucro.
11. Denís Fernández Cabrera escrito o 24 de Marzo de 2010 ás 2:02
Home, Marcus… tes razón que pode ser que Groenlandia mude nalgún intre de política (ímos deixalo aí), pero tampouco nos enganemos: para ben e para mal, na sociedade capitalista na que vivimos os contratos son sacrosantos e o Novo Orde Groenlandés estaría obrigado a respeitalos, alomenos durante un tempo, dando tempo á xente para migrar se fose preciso.
E, con todo, paréceme pouco probable unha maniobra así: hai que ter en conta que a Galiza e a Groenlandia son prácticamente conxuntos disxuntos no tocante a vocabulario, o que significa que a maioría dos rexistros das dúas partes raramente van entrar en conflito.
O que mais me despista é o argumento de que “se a xente xa ten o .gl, pra qué se van mobilizar para o .gal”. Non ves que é xustamente ao contrario? O rexistro masivo de domínios .gl soamente se pode ver coma unha vontade do pobo galego para ter un domínio proprio. Qué mellor argumento para presentar diante da ICANN que o de que temos XXXX-mil dominios .gl rexistrados por falta dun .gal propio? E de verdade pensas que toda esa xente preocupada por ter un domínio “galego” non van, no prazo duns anos dende a aparición do .gal, a migrar ao auténtico domínio do país?
Como tí ben dís (e non es o único: eu tamén o fixen) pensaches no seu día en coller un .gl para tí, e non por iso deixas de apoiar a Asociación PuntoGal (quenes, por certo, estades a facer un magnífico traballo).
Non mo tomes a mal, pero eu teño a impresión de que estás a sufrir unha reacción de “non feito na casa”… Tiñas a túa visión de cómo se debían de xestionar os domínios .gal moi clara, e a maniobra de Dinahosting colleuche (colleunos) despistado.
Veña, unha aperta e ánimo e adiante coa PuntoGal!
12. Marcus escrito o 24 de Marzo de 2010 ás 2:58
#12 Denís, considero que se dende a Asociación PuntoGal aparecemos no ICANN cunha listaxe de centos de dominios .gl rexistrados por galegos (dos que non temos xeito de coñecer a intencionalidade real) sería contraproducente. Dende ICANN o que queren é que non haxa conflitos, e se poñemos coma exemplo o abuso dun ccTLD poderían entender que queremos un dominio territorial e iso non poden concedelo. Ante a dúbida ICANN prefire negar un dominio de primeiro nivel a ter problemas con el.
Facendo unha analoxía moi bestia, sería coma levar á DGT gravacións de vídeo de infraccións de tráfico nun tramo para solicitar a súa modificación. A proba podería ilustrar moi ben unha necesidade, pero a DGT dificilmente poderían tomala en consideración.
13. Alfonso García escrito o 24 de Marzo de 2010 ás 8:41
Da vostede razóns de varios tipos (ningunha me convence), señor Marcus. As que máis predominan son as de “perfecto burócrata ao que lle puxeron patas arriba o chiringuito mental que tiña sobre as cousas”. Hai que adaptarse home, que nestes mundos de hoxe adiántanche pola dereita, pola esquerda e polo medio a pouco que te despistes. Seguro que xa hai máis dun Anxo Lorenzo da vida ríndose deste novo mini-sarillo por nomes, dominios, xentilicios e demais…
Liberdade de escolla. Liberdade de gustos. Que para iso hai cores…
Vexo que non sacou ese parecido fonético de gal cos Grupos Antiterroristas de Liberación… eu xa o lin por algún blog. Se non o escribo rebento!
14. Andrés Salgado escrito o 24 de Marzo de 2010 ás 10:10
Vaia, isto tampouco parece Turkía… ou si? é curioso como caemos en menos dun segundo nas contradicións!
15. Marcus escrito o 24 de Marzo de 2010 ás 10:42
#13 Alfonso, posiblemente os meus argumentos non van dirixidos a ti, e por iso non te convencen (os problemas como a protección xurídica de marcas interésalle principalmente a empresas que buscan certa proxección na Rede).
En ningún momento estou a pedir limitacións na liberdade de elección e, de feito, comento en numerosas ocasións que para quen queira rexistrar un .gl, a nova oferta de Dinahosting é caralluda. Se a xente non quere entender iso…
16. galego escrito o 26 de Marzo de 2010 ás 10:42
agora xunta.gl xa non redirige a xunta.es, dirialle algo a xunta?, asi como a imaxen que mostras de dinahosting.gl foi cambiada, o igual que a de xacobeo.gl
pareceme que empezaron por onde non debian, e identificar .gl de groenlandia con galicia, si algun día se concede o .gal, despois que pasara con ese .gl?
17. Victor Salgado escrito o 27 de Marzo de 2010 ás 10:39
Marcus,
Fixeches unha maxistral exposición do sistema DNS no teo artigo. Noraboa.
Pola outra banda, estou totalmente dacordo contigo nas túas apreciacións.
Os dominios .gl poden dar lugar a disputas de marca e “ciberocupacións” que se deberán (senón debatir) sí executar nun país foráneo.
Esto pode ser un verdadelo pesadelo xurídico para protexelos teus dereitos.
Oxalá cunda a túa recomendación.
Unha aperta.
18. Apoio Grenlandia « ModestoWeb escrito o 28 de Marzo de 2010 ás 12:57
[...] Grenlandia Malia as polémicas. 28 Marzo 2010 | Tags: .gl, Grenlandia, Kalaallit Nunaat | Categoría: Endogamia | [...]