Aínda que parecía que ían falar da polémica Lei de Economía Sustentable, finalmente a intervención de Pedro goretoxo Silva no programa Foro Aberto da TVG foi bastante xenérica, converténdose nunha defensa da reformulación do modelo de dereitos de autor para axustarse á realidade, onde a distribución de contidos en soporte físico está a perder forza, deixando obsoletas leis promulgadas no tempo tecnolóxico da imprenta:

A intervención de Pedro pareceume moi atinada, pero o pouco tempo que deron ao tema no programa fixo imposible a existencia dun debate, quedando sen contrastar a meirande parte das afirmacións que facían tanto Silva coma Barreiro Rivas.
Posiblemente é imposible chegar a un consenso entre todas as partes (hai moitos axentes implicados), pero sobre o que non debería haber ningunha dúbida é de que a propiedade industrial e os dereitos de reprodución non deberían anteporse aos dereitos dos cidadáns, carecendo de sentido que a protección da propiedade intelectual teña prioridade en sede xudicial fronte a delitos de verdade

A semana pasada tivo lugar no programa A Peneira de Dez TV un especial dedicado á problemática laboral no seo do Concello de Melide, que pretendía ser un debate, pero ao que só asistiron representantes dunha parte, pois o Concello rexeitou a invitación da canle de televisión local de Lalín, de aí que o resultado fose un tanto decepcionante.
Coma non todos poden recibir Dez TV nos seus fogares (á miña casa chega de chiripa), velaquí poño a gravación íntegra do programa:

Sen a presenza de Soqui Cea a cousa quedou bastante rara, pois converteuse nunha enumeración de casos puntuais e anécdotas, das que non podemos contrastar puntos de vista, algo que agardo que corrixan no futuro, organizando un debate máis xeral sobre a situación de Melide (sen limitarse á casuística dos conflitos laborais) que conte coa presenza das distintas formacións políticas.

Tamén quero aproveitar a ocasión para desexar moita sorte a Rodrígo Vázquez nesta nova andaina en A Peneira, pois entendo que aparte de ter que coller o pulso ao programa, tamén debe facer fronte a moitas limitacións técnicas (impresión que levei ao ver unha realización do programa lamentable, cunha mala planificación dos tiros de cámara e con moitas incidencias na mestura). Supoño que en Dez TV estarán a vivir unha especie de renacer, co salto á TDT, de aí que certos erros sexan máis que xustificables, mentres que o feito de que dediquen un pouco de atención a Melide resulta moi de agradecer.

ACTUALIZACIÓN (2-2-2010): A Federación de Servizos Públicos de UGT convoca en Melide unha asemblea informativa:

Coma durante o Nadal o programa Bos Días da TVG tiña un formato especial, non contaron coa miña presenza, pero o pasado venres foi o meu retonno, tocando falar dos temas de interese das últimas semanas, coma o novo móbil de Google e a tecnoloxía que puido verse no CES de Las VegaS:

Coma colofón, tivemos ao xa famoso Amir García, quen arrasou no Xapón cantando a canción de As Bolas Máxicas en galego:

A min faríame moita máis ilusión que cantase a canción aquela de todo é moi fabuloso, misterioso, soñador…, que é o sumum do frikerío Xabarín.

O vídeo de Amir suma xa máis de 100.000 reproducións en YouTube:

E a min resúltame especialmente curiosa a aparición no programa de televisión xaponés de Ichigo Mizuki, unha especie de Raphael xaponés que cantaba o tema orixinal de Mazinger Z:

Coido que foi a miña intervención no Bos Días máis friki da historia. Será difícil superalo.

Esta tarde tivo lugar a última entrega do Zapping On Tour, o que finalmente será a morte da marca Zapping. Si, o derradeiro Zapping foi literal, pero iso non quere dicir que Txury e Antón vaian deixar de entreter e facer gozar á súa audiencia, xa que á morte de Zapping séguelle o nacemento de Turquía, que será o nome do programa de televisión que en poucas semanas poderemos ver en Localia.
Nos vindeiros días poderemos descargar a gravación deste impresionante directo para o recordo, coa intervención de moitos vellos amigos, e cun divertido sorteo dunha viaxe a San Francisco (que resultou non ser á cidade norteamericana).
Este repaso de distintas épocas de Zapping fíxonos lembrar o ben que o pasamos co programa nos últimos anos, e tamén houbo que recoñecer que a época de RadioVoz foi alucinante, así como a labor de moitas persoas que involucráronse considerablemente neste proxecto radiofónico, enriquecéndoo considerablemente. Dende aquí unha forte aperta a todos.
Non sei se será posible, pero gustaríame que no futuro puidese replicarse a experiencia dos directos co programa de televisión. É algo máis complexo de organizar, pero supoño que intentarase facer algún tipo de actividade que fortaleza a interacción coa audiencia, que ao final é o máis importante.

Esta mañá sorprendéronme na sección de protocolo do Bos Días da TVG falando das normas básicas de comportamento na Rede, o que tradicionalmente coñécese por netiquette, netiqueta ou ciberetiqueta:

Este tipo de cousas, en vez de falarse na televisión, deberían ensinarse na escola, pois é lamentable que a xente moza non saiba cómo debe comportarse na Internet, e que pensen que un correo electrónico é como unha mensaxe de texto no móbil ou confundan o que manifestan en redes sociais con conversas privadas entre compañeiros.
Tamén habería que respectar a intimidade dos demais, e non subir imaxes e vídeos nos que saian amigos e coñecidos sen o seu consentemento e moitas outras normas que cómpre seguir para que a convivencia na Rede sexa como a do mundo real, e ao igual que non cuspimos aos veciños á cara, na web tamén temos que comportarnos axeitadamente.
E para rematar: ¡morte á arroba coma indicador de xénero neutro! (pois confúndese cun enderezo de correo electrónico por parte de moitas aplicacións).