Nos últimos anos entendiamos que os ordenadores portátiles tiñan unha barreira psicolóxica de 100.000 pesetas (600 euros) que dificilmente se podería reducir, pero no hai poucos meses o prezo de referenza é xa 499 euros, o que sorprendía a moitos consumidores, que pensaban que os estaban a timar, pero para un usuario normal é un equipo suficiente de máis.
Por outra banda están os ultraportátiles de baixo custo, que en España comezan polo Airis Kira 100 a 299 euros, que teñen unhas prestacións ridículas, de xeito que só se entenden coma un equipo para ter grande mobilidade (ou sexa, para viaxar ou para levar a conferencias, pero non coma ordenador principal).
Pero agora está a emerxer un equipo intermedio entre os dous anteriores, sería un portátil de baixo custo, ou sexa, portátiles completos pero cun prezo semellante aos de baixo custo, que acaban de sorprenderme, pois ata o momento só vira algún a 399 euros, e resulta que en APP teñen un a 365 euros:

¡¿365 euros por un portátil de HP?! ¿Cal é a trampa? Pois resulta que este tipo de equipo sería o que custaría 499 euros hai uns meses, pero ao quedar obsoleto o teñen que saldar, de aí un prezo que dificilmente rendibilizaría a súa fabricación.
O ordenador non está moi mal, pois ten un procesador Celeron M520 a 1,6 GHz (vaia, que non é un dobre núcleo, pero para aplicacións básicas serve perfectamente), 1 Gb de RAM (ampliable a 2 Gb), gravadora de DVD, disco duro de 120 Gb, pantalla de 15,4 polgadas cunha resolución de 1.280 x 800 píxeles, Windows Vista Home Basic, Wi-Fi e un peso de 2,7 Kg. Vaia, que o seu principal problema é que a súa tarxeta gráfica non ten memoria dedicada, de xeito que con Vista seguro que vai coma o carallo. Con meterlle XP non debería haber problema para facer bo tal ordenador.
Con estes prezos, ¿quen compraría un ordenador de sobremesa agás os xogóns? ¿Gañarán a guerra do baixo custo os portátiles ou os ultraportátiles? Parece que as cousas van a porse movidiñas nos vindeiros meses.

ACTUALIZACIÓN: Esta mañá escoitei na radio o anuncio dun equipo semellante ao de APP (tamén de HP) que se vende no Corte Inglés por 449 euros (¡Teñen o morro de dicir que o prezo do equipo é de 699 euros! ¡E que o venden co 33% de desconto!), o que queda claro que non se trata dunha boa oferta. Iso si, o do Corte Inglés vén cunha batería de 6 celas e o de APP cunha de 4, o que é bastante importante pero non creo que xustifique o pago de 84 euros adicionais (pois os equipos de baixa gama non están pensados para funcionar moito tempo sen conectar á corrente).

No Britain’s Got Talent (concurso que segue a demostrar ser moi superior a Tú sí que vales e Tienes Talento) un concursante fixo unha imitación de Michael Jackson que se desenvolveu dun xeito realmente curioso:

Non creo que gañe o concurso, porque nas repeticións perderá o efecto sorpresa, pero o tío ten o seu mérito. Iso si, como imite a Vanilla Ice ou a M.C. Hammer en plan Hollywood igual ninguén se decata da diferenza

Na última entrega de Enjuto Mojamuto, o heroe de moitos internautas recoñece que se pasou a Ubuntu:

Para min o mellor de todo o corte é cando aparece en pantalla o Panda Antivirus (sempre me pareceu un produto pésimo, especialmente porque falaba).
O de que o virus Iloveyou tamén é certo que é moi vello (8 aniños ten o cabrón), pero eu sempre entendín que tiña outra pinta:

Hoxe en RadioVoz estiven a falar de distintos temas con Isidorio Valerio, como a saída do AVG Anti-Virus Free Edition 8.0, o dicionario de galego en liña de Ir Indo, a rede social da WWE e o lanzamento do GTA IV:

Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.

Si, si, comezamos bromeando un pouco sobre a Wii Fit, porque se comezou a vender en España o pasado venres, e hoxe mesmo vin a táboa de equilibrio en funcionamento no Carrefour:

Non hai dúbida, o produto vai venderse moi ben, aínda que limitado polo reducido número de Wiis que hai en España. Non o digo de coña, pois Nintendo comercializou moitas máis unidades noutros países, de aí que aquí fose tan difícil de conseguir a consola. Cando a Wii acade unha masa crítica importante vermos coma os accesorios voarán das tendas (polo momento a Wii Fit se pode mercar sen problemas de stock).
Pero o lanzamento de Nintendo vai quedar eclipsado polo Grand Theft Auto IV, que vai ser posiblemente o xogo do ano. Van vender moitísimo, e máis de un mercará a Xbox 360 só por este xogo (algúns tamén picarán coa PS3, pero coido que aínda é demasiado cara como para que chegue a imporse á consola de Microsoft).
Iso si, ¿alguén se atreve a pór unha data para que nos telexornais aparezan asociacións de pais denunciando o xogo? Eu apostaría algo a que vai ser mañá mesmo, co lanzamento do xogo, cando veremos as primeiras queixas nos informativos, para que durante a fin de semana haxa incluso algunha reportaxe sobre a tópica violencia nos videoxogos (curiosamente nunca critican de igual xeito ó cine nin á televisión, pese a que dende CSI ata as series de médicos son máis violentas que o GTA IV).

O Audi de Iron Man lémbrame que está a pique de comezar a tempada de pelis (e que o cine tamén pode recibir achegas económicas a través da publicidade, e non só esprimindo directamente o peto dos espectadores). Por fin van a chegar ás carteleiras as películas frikis que levamos tempo agardando. Preparei así un calendario con algunhas destacables:

Marquei en negriña as que teño pensado ir ver, aínda que nunca se sabe (ao final igual perdo algunha e vou a outras sen contar).
O que destacaría especialmente é que parece que a planificación das estreas é moi boa, de xeito que cada película baseada nun cómic se estrea nun mes distinto (agás no caso das 2 últimas, que conservan unha distancia prudencial).

¿Cales funcionarán mellor? Resulta difícil facer un prognóstico, pero eu coido que as películas que van facer mellor taquilla das mencionadas serán a de Iron Man (que é a que ten mellor pinta) e a de Indiana Jones (polo elemento nostálxico) aínda que admito que preferiría que arrasase a de Batman (The Dark Knight) pois iso podería impulsar a adaptación de máis personaxes do Universo DC, que normalmente se limita aos dous de sempre (Bats e Supes).
O trailer de Iron Man deixa claro que a peli vai ser unha pasada:

¿E qué películas defraudarán? Desconfío moito da película de Indy, pero creo que poden estar bastante peor a do Superagente 86 ou La Momia 3, e incluso apostaría algo a que a segunda entrega das Crónicas de Narnia non vai ter o tirón de sagas como a de Harry Potter. Ah, e o fiasco do ano podería ser Speed Racer, pois non creo que haxa moita xente que se deixe levar pola nostaxia de Meteoro.

Para apostar seguro, non creo que ninguén dubide que Kung Fu Panda e Wall·E van facer boa caixa só por estar dirixidas aos cativos (aínda que admito que teño ganas de ver as dúas) e Hellboy 2, sen facer marabillas, tamén conservará os bos resultados da súa anterior entrega (que sin ser espectacular, convenceu aos amantes deste tipo de cine, o que é difícil que consiga Wanted).

Remato subliñando que a meirande parte das estreas do verán poderían saír directamente en DVD, pero está claro que a época é boa para aproveitarse do público mozo e infancil, que tragará calquera cousa sen contemplacións.