O pasado venres, co gallo da apertura das aplicacións máis populares de Microsoft á interoperabilidade, publicáronme en La Voz unha pequeniña columna de opinión.
Quixera aclarar que algúns medios publicaron que Microsoft abría o código fonte dos seus programas, pero o que en realidade difundirá será a API dos mesmos, ou sexa, as especificacións que permiten comunicarse entre as distintas aplicacións.
Nun principio Microsoft se compromete a:
- asegurar a comunicación aberta
- promover a portabilidade dos datos
- mellorar o soporte de estándares da industria
- fomentar a relación entre usuarios e industria, incluíndo as comunidades de código aberto
Iso quere dicir que vai ser doado que os programadores fagan engadidos para o Office (entre outras moitas cousas) polo que se poderá incorporar o soporte de formatos abertos, aínda que me dá no nariz que os que tirarán máis proveito desta posibilidade serán os creadores de software a medida, pois terán máis doado facer produtos que se entendan con aplicacións de Microsoft.
De tódolos xeitos hai que lembrar á xente que o que está a facer Microsoft é unha obriga imposta pola Comisión Europea. Microsoft tiña unha vantaxe competitiva para desenvolver aplicacións para Windows, pois non publicaban tódalas especificacións da súa plataforma, e agora a cousa cambia, e se equilibra o mercado… aínda que moi tarde. ¿De qué serve agora que outras aplicacións ofimáticas poidan funcionar mellor baixo Windows cando Microsoft xa domina o sector).
Tamén cómpre indicar que esta apertura xa se practicaba cos partners, ou sexa, cos amiguiños, de xeito que podemos entender que Microsoft quere ter máis amigos, o que nun principio é mellor para todos.