Uns cantos blogueiros coruñeses levan tempo argallando un punto de encontro para os blogs da cidade, e tras moitas voltas inician un agregador de blogs turcos que responde o nome de CoruBlogs (que estivo a piques de chamarse Cascarilleiros).
Poderiamos dicir que este lanzamento coincide co Blog Day 2007 (coido que hoxe e a data oficial da estrea) e Nacho de la Fuente comenta que xa hai uns 30 blogs listados. Cando o número medre un pouco máis a cousa vai ser un desfase, pero polo momento o sistema nos permitirá saber que hai un lugar de referencia para os blogs coruñeses, unha web que moitos non dubidarán en chamar kel

Outro ano máis hai que celebrar o Blog Day recomendando 5 blogs alleos e non relacionados, ou sexa, espazos que non pertenzan ó blogroll nin a usuarios habituais, para promover a blogosfera e evitar a endogamia. Iso fai así que a tarefa sexa complicada e que as recomendacións non sexan todo o boas que deberían, pero eu lánzome a recomendar 5 cadernos dixitais:
-Carallo World: é un espazo para a carallada, que coincide en moitos contidos co meu blogue, pero que se gañou a miña recomendación só pola publicación da seguinte tira:

-O Blog de Paula García: non debería recomendar este blogue porque xa falei do mesmo cando saíu na Galega, pero a información canina das últimas semanas valéronlle a miña atención. Velaquí unha mostra dos cadeliños:

-Monkeyzen: Blog moi preocupado polo deseño, que conta cunha boa sección sobre orixinais camisolas como as de Porcographic ou a de Nerdy Shirts inspirada en Street Fighter II
-Smashing Magazine: blog en inglés no que amosan elementos do deseño gráficos dignos de mención. Amosan así recompilacións de iconas, seleccións de blogs con bo deseño ou amosan páxinas web de erro (404) moi orixinais. Alí atopei a seguinte imaxe de Neil Duerden (menuda paciencia teñen que ter algúns deseñadores):

-Testosterona: debe de ser un dos blogs cun nome que mellor indica a súa temática, pois destaca por empregar calquera desculpa para por imaxes de mozas cachondísimas, pero de cando en vez nos sorprende con imaxes como a seguinte:

¿A que parecen fotografías tomas durante unha orxía sexual? Pois non é o que parece.

E ata aquí o Blog Day 2007. Agardo que as miñas recomendacións fosen do voso agrado, aínda que procurarei recomendar moitas máis webs durante o ano (iso de agardar ó 31 de agosto para ligar a outros espazos só o fan os blogueiros preguiceiros).

Estes días os de Nokia están metendo moita caña, pois anunciaron o Nokia N81 (que aparte de ser un excelente reprodutor multimedia, tamén é cómodo para xogar… ¡e ten un vídeo musical que é toda unha risa!), un Nokia N95 con 8 Gb de disco e unha tenda de música virtual en plan iTunes, ou sexa, que están intentando aproveitar a súa posición no mercado do móbil para competir con Apple; pero cando vemos o vídeo de presentación das novas interfaces que están a preparar para 2008 podemos pensar moi mal:
O segundo móbil é un calco descaradísimo do iPhone, e podería ser unha realidade de confirmárense os rumores de que un grande fabricante encargou entre 6 e 8 millóns de pantallas como as do iPhone, pero eu coido que a primeira interface é moito mellor. Un móbil navegable mediante un círculo táctil (lembremos os iPod) será máis práctico (para un uso xeral) que unha pantalla táctil, pois evita encher de merda a pantalla (¡que noxo dan algúns smartphones que teñen de exposición na FNAC!) e permite ver a mesma mentras se emprega (os dedos non son transparentes).
Non entendo por qué nos blogs só están a saír os 20 últimos segundos do vídeo, nos que só se ve o clon do iPhone (e que nun primeiro momento pensei que era un fake), porque o outro móbil é moito máis interesante, e podería indicar mellor o que está a buscar Nokia, principalmente porque é unha interface que podería empregar incluso nos terminais relativamente baratos, e non só nos modelos multimedia con Wi-Fi, HDSPA e todas esas gaitas que non usan a meirande parte dos usuarios.
Revolucionar as interfaces de usuario é algo preciso, pero non deixo de pensar que incluso esta nova interface está demasiado inspirada na do iPhone.

Ía deixar o vídeo dunha homenaxe conxunta ós Simpson e a Star Wars para outro día, pero en vista de que está a saír na metade dos blogs que coñezo (aínda que o primeiro no que o vin foi en Freak’s City) póñoo xa, para que non saiba logo a reseso:

En Abadía Digital atopo un meme que considero interesante, pois pregunta polo uso que se fai de Gmail, xa que ó tratarse dunha conta de correo case ilimitada, ten predisposición a encherse de lixo.
Neste momento o meu uso é do 46%:

Recoñezo que supero moitas veces o 50%, pero baleirando a papeleira e eliminando os contidos do cartafol para o spam manteño a capacidade a raia.

Non levo moito tempo usando Gmail de xeito intensivo pois, aínda que tiña a conta de correo dende 2004, paralelamente empregaba outras contas alternativas, pero agora veño máis práctico centralizar as contas en Gmail, pois así evito ocupar xigas de disco en varios ordenadores. Ademais, buscar correos vellos en Gmail é máis rápido que, por exemplo, no propio ordenador empregando Outlook Express ou Thunderbird, polo que agardo que non falle moito o servizo de correo electrónico de Google.

Supoño que a meirande parte da xente ten poucas mensaxes no correo, pois non fan un uso profesional do mesmo, aínda que tamén sospeito que algúns teñen a caixa do correo petada de vídeos e presentacións de PowerPoint (é o que pasa cando non borras o que mandan os colegas en plan coña), pero supoño que esta última tendencia estará en perigo de extinción grazas a YouTube, Slideshare e servizos semellantes.

Veña, botade a lingua a pacer. ¿Qué uso do Gmail (ou o correo que usedes) facedes?

Na República Checa están a lanzar unha campaña de fomento á lectura na que amosan a personaxes de comics lendo libros. Dentro do universo Marvel colleron, como non podía ser doutro xeito, ó trepamuros:

Iso si, do Universo DC vese que Batman, Superman, Flash, Wonder Woman e Green Lantern estaban ocupados, e colleron a Halle Berry disfrazada de Catwoman:

Estes anuncios non sei se serán moi efectivos para levar a xente a visitar BOOKS more & more e a ler, pero eu agradecería que os debuxos fosen de calidade (¿saberán os publicistas o pouco que cobran os debuxantes de comics de verdade por encargos dese tipo?).
Iso si, este tipo de campañas son moi difíciles de facelas ben, e a última que lembro era a da Bola de Cristal na que se amosaban parvadas para rematar dicindo: “si no quieres ser como ellos, lee“. Coido que dende esa campaña xa choveu bastante

O que algúns frikis podemos considerar algo despectivo que se amosen personaxes de cómic lendo libros coma se os comics non fosen tamén lectura. Ah, e xa postos, ¿por qué non usar a Spidey para fomentar a lectura da prensa?

Si, si, esas ideas son moi orixinais ¡Está prohibido comparar as calidades dos debuxos!

O iPhone podería converterse nun dispositivo moi atractivo para o acceso á web, pero amosa unha resolución de pantalla moi reducida, de xeito que a meirande parte das webs teñen un grande problema para verse no móbil: hai que facer desprazamentos horizontais para ler as liñas de texto. Por iso, é posible ver as webs en formato horizontal, pero iso non é suficiente sempre, e para solucionalo nos blogs con Wordpress existe un tema chamado iWPhone que funciona combinado cun engadido (plugin), de xeito que amosa a portada deste blogue así:

Non é un sistema moi atractivo, pero resulta moi práctico, xa que presenta a información básica para ver se un quere ler logo unha entrada particular do blogue. Así, poderiamos afirmar que este tema permite un uso máis óptimo dos blogs no iPhone, pero sacrifica a aparencia gráfica dos mesmos e a súa personalidade, polo que non creo que acade moito éxito.
Pero se algo positivo ten este tema é o engadido que fai que só se amose dende o iPhone, de xeito que poderiamos ter un tema específico para os nosos blogues no caso de que se visen dende pantallas pequenas. Vaia, que poderiamos ter unha versión dos mesmos conservando a estética, pero, por exemplo, omitindo os contidos das columnas suplementarias (con fluxos RSS doutras webs, un blogroll inmenso, acceso ó arquivo…) para que a súa carga sexa máis rápida e os contidos aproveiten mellor o pouco tamaño de presentación do iPhone (e dos móbiles semellantes que irán aparecendo nos vindeiros meses).

Así, a xeito de servizo público deuseme por comprobar cómo se verían algúns blogs e páxinas de amigos e coñecidos, para ver se precisarían de medidas urxentes de remodelación no caso de que os seus administradores e lectores fosen adictos ós trebellos de Apple, comezando por Intramuros, por aquilo de que foi o blog que dende o que partiu o meme da miña simpsonización.
Curiosamente en vertical se podía ver bastante ben a aparencia do blog, e en horizontal o texto case colle a tamaño completo. A verdade é que a resolución do iPhone (480 x 320 píxeles) é moi cutre, especialmente se a comparamos con dispositivos que tenden á resolución WVGA (800 x 480 píxeles) que si permitirían unha cómoda lectura, pero coñecendo esa limitación xa temos unha nova referencia de ancho para as columnas de texto para os máis fanáticos (480 píxeles), que curiosamente teñen blogs coma eCuaderno:
E o mesmo lle pasa ó blogue de Modesto, que na súa enésima remodelación estética se ve bastante ben no iPhone:

Aínda así, non é crucial que o ancho non supere os 480 píxeles, xa que cun pouco de zoom out o texto ainda é lexible, e mesmo co ancho completo hai moitas páxinas que se len correctamente, como as seguintes:
-Deakialli (tamén capturei o blog en vertical):

-Microsiervos:

-Trebellos:

-O blog de Andrés Milleiro:

-E, evidentemente, Código Cero:

Pero a experiencia non quedou ausente de sorpresas, e así, ó visitar Chuza en vertical, a web apareceu totalmente descomposta, o que me asustou. Nese momento pensei: “se pasa iso a Chuza, ¿cantas webs van ter que pensar en cambiar de imaxe por mor do iPhone?“.
Pero a cousa solucionouse de xeito doado con só xirar a pantalla. As entradas en Chuza se podían ler sen problemas, e mesmo funcionaban as funcións en AJAX (non as provei profundamente, pero sospeito que a meirande parte da web será operativa no iPhone, o que non masa en mooooitas páxinas, o que está forzando a servizos populares coma Facebook ou Bloglines a adaptarse rapidamente ó teléfono de Apple para non perder certo tipo de usuarios). Ou sexa, que apostaría que Bertiño vai estar contento cando merque o iPhone e vexa que non vai ter que adaptar Chuza para a súa consulta dende calquera lugar:

Pola contra, os medios xeralistas deberían mirar ben se lles paga a pena facer reformas, ou sexa, ter cousas semellantes ó engadido de Wordpress, e remitir ós usuarios de móbiles e PDA a versións diferentes das súas webs, xa que as portadas recargadas dan problemas, como podemos ver na web de La Voz:


Podemos ver que, aínda que a cabeceira se ve moi ben no iPhone, segundo imos baixando pola portada, a cantidade de contidos resulta moi confusa, e non é doado distinguir o que hai na mesma.

Se sumamos que o Flash aínda non funciona no iPhone, algunhas webs como a da TVG non funcionarían ben:

A parte do Xabarín Club está en Flash e, aínda que se ve na captura (tomada co iPhoney) non se vería nun iPhone de verdade (a Monchiño, pola contra, veríamolo sen problemas). O que tampouco funcionaría en absoluto é todo o relativo á televisión á carta ou en directo (que utiliza tecnoloxía de Microsoft) polo que, de ter moita difusión o iPhone, algunhas webs deberían reflexionar sobre as súas plataformas dixitais, aínda que hai que recoñecer que as webs que apostaron por Microsoft teñen a batalla medio gañada, xa que hai moitos terminais telefónicos con Windows Mobile (que si poderían acceder ós vídeos). Supoño que nalgún momento os de Apple pasarán polo aro de Adobe, e incluirán Flash no seu terminal, o que cambiaría bastante o panorama, pois o Flash nos móbiles achegaría moitos contidos de vídeo e mesmo xogos (como xa pasa coa Wii).

Para ser un defensor do Nokia N800 e o Toshiba Portégé G900 estou a dedicarlle moita atención ó iPhone, ¿non?